Bugün beynəlxalq valyuta birjalarında dollar major valyutalar qarşısında bahaşır. Beynəlxalq Valyuta Fondunun (BVF) ekspertləri ABŞ iqtisadiyyatının cari yüksək aktivliyinin tempinin qısa müddətdə sonlanacağını düşünürlər. Eyni zamanda, qeyd olunur ki, ABŞ-da məhsuldarlığın artımı digər amillərlə yanaşı, Avropa ilə müqayisədə yeni texnologiyaların inkişafına daha böyük özəl investisiyalar hesabına təmin edilir.

Aprel ayında BVF Amerika iqtisadiyyatının artım perspektivləri ilə bağlı proqnozunu yeniləyib. 2024-cü ildə ABŞ ÜDM-nin 2.7% artacağı proqnozlaşdırılır, lakin artıq 2025-ci ildə fond artım templərinin 1.9%-ə qədər azalacağını ehtimal edir. BVF-də Amerika iqtisadiyyatının hazırda güclü məhsuldarlıq artımını, güclü istehlak tələbi və ev təsərrüfatlarının artan xərcləri nümayiş etdirdiyini bildirirlər.

EURUSD valyuta cütlüyü Avropa ticarət sessiyasına 1.0717 səviyyəsində başlasa da, hal-hazırda 1.0702 səviyyəsinə qədər ucuzlaşıb. Eyni dövr ərzində GBPUSD cütlüyü isə 1.2562 səviyyəsindən 1.2536 səviyyəsinə qədər düşüb. USDJPY cütlüyü dünən tarixi maksimum həddini yeniləyib. Belə ki, 160.150 səviyyəsini test etdikdən sonra, dollar/yen məzənnəsi 154.570 səviyyəsinədək ucuzlaşdı. Hal-hazırda cütlük 156.730 səviyyəsində ticarət olunur. 

Bugün bazar iştirakçıları dərc olunacaq statistik məlumatları diqqətlə izləyəcəklər. Belə ki, analitiklərin fikrincə Avrozonada illik inflyasiya, ilkin hesablamalara görə, mart ayı ilə müqayisədə aprel ayında 2.9%-dən 2.6%-ə enib. Həmçinin Almaniya Federal Məşğulluq Agentliyi işsizlik səviyyəsi ilə bağlı məlumatları dərc edəcək. Ekspertlər ehtimal edirlər ki, aprel ayında ölkədə işsizlik səviyyəsi, mart ayında olduğu kimi, 5.9% təşkil edəcək.

Eləcə də, Almaniya Federal Statistika İdarəsi (Destatis) Avropanın ən böyük iqtisadiyyatı olan ölkə üçün ÜDM məlumatlarını dərc edəcək. Bugün həmçinin, “Eurostat” birinci rüb üzrə Avrozonanın ÜDM dinamikasının ilkin qiymətləndirməsini dərc edəcək. Ekspertlər ÜDM-in illik ifadədə 0.2%, rüblük ifadədə isə 0.1% artdığı fikrini irəli sürürlər.

Bakı vaxtı ilə saat 18:00-da “Conference Board” analitik şirkəti ABŞ-da İstehlakçı İnamı İndeksini dərc edəcək. Analitiklərin hesablamalarına görə, apreldə ayında indeks mart ayı ilə müqayisədə 104.7 bənd səviyyəsindən 104 bənd səviyyəsinədək zəifləyib.

© investaz.az