Pakistanın Azərbaycanda bəzi əməliyyatları olan böyük banklarından biri (adı açıqlanmır) ölkəmizdə mövcudluğunu genişləndirməyi planlaşdırır.

Bunu açıqlamasında Pakistan-Azərbaycan İqtisadi Əməkdaşlıq Palatasının (PAKAZCHAM) prezidenti Xurram Javaid Bhatti bildirib.

Bundan başqa, onun sözlərinə görə, Pakistanın bəzi sığorta şirkətlərinin Azərbaycan bazarı ilə bağlı planları mövcuddur: "PAKAZCHAM "Azərbaycan Sığortaçılar Assosiasiyası" ilə "Pakistan Sığorta Assosiasiyası" arasında əməkdaşlıqda vasitəçidir. Bu tərəfdaşlıq iki ölkənin sığorta şirkətlərinin birgə işləməsi, sərhədlərarası müştəriləri müəyyən etməsi və sərhədlərarası məhsullar hazırlaması üçün imkan yaradacaq, bununla da təkcə hər iki ölkənin sığorta sektorlarını gücləndirməyəcək, həm də Azərbaycan və Pakistan arasında ümumi iqtisadi əməkdaşlığa töhfə verəcək".

"Eyni zamanda "Bakı Fond Birjası" və "Pakistan Fond Birjası" arasında əməkdaşlıq barədə ilkin müzakirələr aparılır. Bu tərəfdaşlıq isə ikili listinq, sərhədlərarası investisiyalar və bilik mübadiləsi üçün əla platforma təmin edə, iki ölkə arasında maliyyə əməkdaşlığını əhəmiyyətli dərəcədə gücləndirə, iqtisadi artım və inkişaf üçün yeni imkanlar aça bilər", - deyə o qeyd edib.

Bundan başqa, Palata rəhbəri əlavə edib ki, Pakistanda investisiyaların idarə edilməsi sahəsində fəaliyyət göstərən şirkətlər geniş ictimaiyyətə xidmət göstərmək üçün Azərbaycana dəvət edilə bilər: “Bu təşəbbüs yerli kapital bazarını gücləndirməyi, bu sektorda ən yaxşı təcrübədən istifadə edərək strukturlaşdırılmış və idarə olunan platforma vasitəsilə müxtəlif investisiya imkanlarına daha yaxşı çıxış təmin etməyi hədəfləyir. Bu əməkdaşlıq peşəkar investisiya idarəetməsini gətirməklə və ictimaiyyət üçün mövcud olan maliyyə xidmətlərinin çeşidini genişləndirməklə Azərbaycan bazarına əhəmiyyətli fayda verəcək”.

1996-2022-ci illərdə Azərbaycanda Pakistan Milli Bankının Bakı filialı fəaliyyət göstərib. Hazırda filial ləğv prosesindədir. Bundan başqa, Pakistanın "MCB Bank"ı 2009-2019-cu illərdə "MCB Lizinq", 2019-cu ildən bu günə qədər isə "MCB" bank olmayan kredit təşkilatı (BOKT) qismində Azərbaycan bazarında təmsil olunub.

©report