Satışları 20 % azalan "General Motors", Çindəki əməliyyatları yenidən qurarkən 5 milyard dollardan çox mənfəət itkisi ilə üzləşəcəyini bildirib.  

Valyuta.Az "CNBC"ə istinadən xəbər verir ki, Çinli rəqibləri qarşısında bazar payını itirən avtomobil istehsalçısı dördüncü rübdə 2,6-2,9 milyard dollarlıq xərclərin Çindəki birgə müəssisənin yenidən qurulması ilə bağlı olacağını açıqlayıb.  

"GM", 2023-cü ilin ilk doqquz ayında Çin bazarında 347 milyon dollar zərər edib. Bu dövrdə satışlar təxminən 20 % azalıb və bazar payı 8,6 %-dən 6,8 %-ə düşüb. Halbuki, 2015-ci ildə "GM"in Çindəki bazar payı 15 %-dən yüksək idi.  

Şirkət, Çindəki əməliyyatlarının qısa müddətdə bərpa olunacağını gözləmədiyini bildirib. Açıqlamada qeyd edilib: “Kapital məhsuldarlığına və xərclərin idarə edilməsinə diqqət yetiririk. Çindəki müəssisəmizlə birlikdə fəaliyyətimizi dayanıqlı və gəlirli hala gətirmək üçün çalışırıq. 2025-ci il nəticələrinin illik əsasda yaxşılaşacağını gözləyirik.”  
 
"GM"in Çində üzləşdiyi çətinliklər dünyanın ən böyük avtomobil bazarı olan ölkədə ümumi bir tendensiyanı əks etdirir. "BYD" və "Geely" kimi iddialı Çin avtomobil şirkətləri yeni modellər təqdim edərək və qiymətləri endirərək Avropa, Yaponiya və Cənubi Koreya istehsalçıları ilə yanaşı, "GM" kimi Amerika şirkətlərinin də bazar payını kiçildir. Bundan əlavə, Çin istehsalçıları Asiya, Avropa və Latın Amerikası kimi digər bazarlara da daha çox avtomobil ixrac etməyə başlayıb.  

Rəhim