“Green card”la Amerikaya getmək istəyənlərin tərəddüd etdiyi məsələ orada yaşayışın və xərclərin necə olmasıdır. Əsasən də, səhiyyə  baxımından Amerikada qiymətlərin çox baha olduğu, həkimə yolun düşsə, xərcin fantastik dərəcədə çox çıxacağını deyirlər. 
Bəs reallıq necədir?

Amerikada yaşayan azərbaycanlı Turqut Əliyev Valyuta.az-a açıqlamasında dedi ki, Amerikada tibbi xərclər baha olsa da, hər təbəqədən olan əhali üçün sığorta xidməti fəaliyyət göstərir: “İki tip sığorta var: ştat sığortası və özəl sığorta. Hər ştatın öz sığortası olur. Ştat sığortası az gəlirli insanlar üçün nəzərdə tutulub. Bu sığorta tamamilə pulsuzdur. Bu sığorta ilə özəl tibb müəssisələri ilə nisbətdə daha aşağı səviyyəli xəstəxanalara üz tutmalı olacaqsınız. Burada özəldəki həkimlər qədər işə həssas yanaşma olmaya da bilər. Özəl sığorta isə Amerikada hansısa şirkətdə işə daxil olan zaman sizə təqdim edilən sığortadır. Burada seçim çoxdur, müxtəlif şərtlərdə sığorta paketləri mövcuddur. İstədiyinizi seçib, yararlana bilərsiniz”.

Yəni Amerikada səhiyyə xərclərini siz yox, sığorta ödəyəcək. Sadəcə bu barədə məlumatlı olmalısınız: “Amerikada əlaqələri, dost-tanışları olmayan, məlumatsız olan insanlar çətinlik çəkirlər. Amma araşdırsalar biləcəklər ki, sığorta almaq vacibdir. Sığorta almasalar, səhiyyə xərclərini öz ciblərindən ödəməli olacaqlar. Bu da onlara baha başa gələcək. Məlumatsız olduqları üçün bunu ciddiyə almırlar. Ona görə də, Amerikaya gələndə ingilis dilini mütləq öyrənməlisiniz”.

Nuray