Bakıda lüks villalar bazarı gündən-günə daha maraqlı təkliflərlə zənginləşir. 

Bu dəfə şəhərin ən prestijli ərazilərindən biri hesab edilən Məmməd Araz küçəsində (keçmiş Teymur Əliyev küçəsi) yerləşən fantastik villa satışa çıxarılıb. Dəbdəbəli mülkün qiyməti isə nə az, nə çox, 5 milyon manatdır.

Mülk 2,2 sot torpaq sahəsində inşa edilmiş və ümumi sahəsi 950 kv.m olan 4 mərtəbəli villadır. Villada ümumilikdə 11 otaq, o cümlədən, 8 yataq otağı, 3 geniş zal, böyük mansard mövcuddur.

Hər mərtəbədə sanitar qovşaqlar yerləşir, villada həmçinin sauna və qapalı hovuz da var. Əlavə olaraq, kombi sistemi, qaraj, generator, sauna, manqal və hətta təndir də daxil edilib.

Mülk klassik üslubda yüksək səviyyədə təmir olunub. Satıcı qeyd edir ki, təmir zamanı yalnız ən bahalı tikinti materiallarından istifadə edilib. Villanın 80%-ə qədər hissəsi rəssam əl işlərindən ibarətdir ki, bu da ona unikal estetik dəyər qazandırır.

Sözügedən ev yalnız interyer təmiri ilə deyil, həm də içərisindəki bütün bahalı mebel və avadanlıqlarla birlikdə təklif olunur. Barter təklifləri də qəbul olunur

Elan müəllifi villanın bir hissəsini nəğd pul, digər hissəsini isə barter təklifləri ilə də qəbul etməyə hazır olduğunu da vurğulayıb. 

Qeyd edək ki, Bakının daşınmaz əmlak bazarında bu kimi elanlar son zamanlar daha çox diqqət çəkməyə başlayıb. Bahalı villalar, xüsusi təmir və əşyalara malik mülklər tez-tez elan saytlarında satışa çıxarılır. 

©Yenisabah.az