“Aqrar Sığorta Müştərək Sığorta Şirkəti”nin 2024-cü ilin ilk on bir ayında topladığı sığorta haqqları 12,83 milyon manata bərabər olub. Bu isə ötən ilin eyni dövrünə nisbətən 15,3 % azdır.

Valyuta.az-ın məlumatına görə, son bir ildə müştərək sığorta şirkətinin yığımları 2,34 milyon manat azalıb. Belə ki, 2023-cü ilin eyni dövründə “Aqrar Sığorta”nın yığımları 15,16 milyon manat təşkil etmişdi. 

Sığorta şirkətinin yığımları azalsa da, ödənişləri 2 dəfədən çox artıb və bu ilin yanvar-noyabr aylarında 5,6 milyon manata çatıb. Başqa sözlə, şirkətinin ödənişləri 2,89 milyon manat artıb. 2023-cü ilin ilk on bir ayında isə ödənişlərin ümumi həcmi 2,7 milyon manat təşkil etmişdi.

Son nəticədə sığorta şirkətinin zərərliyi 18 %-dən, 44%-ə yüksəlib. 

Xatırladaq ki, 2020-ci ildə yaradılan “Aqrar Sığorta Müştərək Sığorta Şirkəti” 7 sığorta şirkəti tərəfindən bərabər paylarla təsis edilib. Müştərək şirkətin əsas fəaliyyəti Aqrar Sığorta Fondu adından aqrar sığorta sisteminin idarəedilməsidir.