Həyatda hər birimizin həyata keçirmək istədiyimiz hədəflərimiz olur. Hədəflərimizi həyata keçirərkən bəzi məsuliyyətləri üzərimizə götürmək lazım gəlir. Planlı olmaq da bir məsuliyyətdir. Gün içərisində bəzən özümüzə ayıracaq vaxtımız olmur. İş həyatının yorğunluğu , hədəflər varkən  bəzən işləri çatdırmaq olmur. Elə bu nöqtədə planlı olmaq, planlı çalışmaq olduqca önəmlidir. Hədəflərimizə çatmaqda əsas rol oynayan plan nədir?  Planlı olmağın faydaları nələrdir?

Plan qurmaq niyə vacibdir?

Su kimi axıb gedən zaman hər kəs üçün dəyərlidir. Geri dönüşü olmayan və sürətlə keçib gedən zaman içərisində hədəflərimizə varmaq üçün planlı yaşamaq da çox önəmlidir. Çünki hər bir insanın “İşləri çatdıra bilmirəm” dediyi vaxtlar olur. Bu narahatlığın əsas səbəblərindən bəziləri qeyri-müəyyənlik, zamanı idarə edə bilməmək, plansız yaşamaqdır. Amma plan qurmaq qarşıya qoyulan məqsədlərə nail olunmasının gedişatını izləməyi və qiymətləndirməyi asanlaşdırır. Harada olduğunuzu görmək üçün müntəzəm olaraq yoxlaya və lazım olduqda planlarınızı nəzərdən keçirə bilərsiniz. Bu həm şəxsi inkişafınız, həm də biznes performansınız üçün böyük əhəmiyyət kəsb edir.

Plansız yaşamaq günümüzü bizdən alır.

Plansız yaşamaq zamanı idarə etməyi çətinləşdirir. Buna görə də işlər dağıla, gərəksiz  zaman xərclənə bilər. Plansız yaşamaq qeyri- müəyyənlik yaradır və bu da stress səviyyəsini artırır. Hədəflərə çatmaq üçün yol xəritəsi - plan olmadan hərəkət etmək işləri çətinləşdirir və insanı  narahat bir hala gətirir. Ən önəmli nüanslardan biri, plansızlıq insanı məqsədindən uzaqlaşdıra bilər. Bu durum  motivasiyanı düşürə, irəli addımlamaq yerinə vəziyyəti durğunlaşdırmağa apara bilər.

Həm kritik, həm də gündəlik məqsədlər üçün necə planlı bir insan ola bilərik?  

Həyatımızın istiqamətini dəyişdirə biləcək qərarlar qəbul edərkən etdiyiniz planlaşdırma çox vacibdir. Qabaqcadan planlaşdırma uğura aparan yolda atılacaq ən vacib addımlardan biridir. Etmək istədiyiniz hərəkətləri və ya öyrənmək istədiyiniz mövzuları müəyyən zaman dövrlərinə bölmək məhsuldarlığınızı artırır və motivasiyanızı yüksək saxlayır. Bu prosesdə günlərinizi və həftələrinizi diqqətlə planlaşdırmalı və hər gün üçün konkret hədəflər qoymalısınız. Asandan çətinə doğru irəliləyən və prosesi kiçik və idarə oluna bilən hissələrə ayıran plan xəritəsi məqsədlərinizə çatmağın ən təsirli yollarından biridir. Bu, motivasiyanızı yüksək saxlayır və uğur şansınızı artırır. Birincisi, sadə, qısamüddətli hədəflərdən başlayın. Bu məqsədlər sizin üçün asanlıqla əldə edilə bilən olmalıdır və nailiyyət hissini gücləndirməlidir. Məsələn, kiçik gündəlik və ya həftəlik tapşırıqlar təyin edin və onları uğurla tamamladığınız zaman özünüzü mükafatlandırın.

Planı yazmaq

Əlinizdə bir təqvim saxlamaq və ya planlarınızı telefonunuzda qeyd hissəsində yazmaq gündəlik həyatınızı daha mütəşəkkil və səmərəli edə bilər. Tapşırıqları, vacib görüşləri və məqsədləri qeyd edə bilərsiniz. Gündəlik planlarınızı yazılı şəkildə qurmaq prioritetlərinizi aydınlaşdırır, vaxtınızın idarə edilməsini yaxşılaşdırır və unutmamağınız lazım olan vacib detalları xatırladır.

Planlı olmaq təkcə planlar qurmaq deyil, həm də həmin planları davam etdirə bilməkdir.

Planlarınızı həyata keçirərkən diqqətinizi yayındıran şeylərdən uzaq durun. Diqqətin yayındırılması diqqəti cəmləməyə mane olan hər şey ola bilər: 

texnoloji cihazlar, sosial media, ətraf mühit faktorları və ya daxili düşüncələr. Günün sonunda tamamladığınız planları və mərhələləri işarələməklə irəliləyişinizi qeyd edin. Planlarınızı tamamladığınızı görərək, bir müvəffəqiyyət hissi yaşayırsınız və növbəti gün üçün daha enerjili və istəkli olursunuz. Bu sadə, lakin güclü vərdiş gündəlik məqsədlərinizə çatmağı asanlaşdırır və ümumi məhsuldarlığınızı artırır.

Sərvanə Rəmixanova