"Yük Taksisi.Az" MMC, “Evakuator.Az” MMC-nin direktoru barəsində cərimə protokolu tərtib olunub. 

Valyuta.az-ın məlumatına görə, MMC-lərə rəhbərlik edən Zeynalov Aqil İsmayıl oğlu barəsində Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən İnzibati Xətalar Məcəlləsinin 199 maddəsi ilə protokol tərtib edilib. 

Xidmətin inzibati qərarından Aqil Zeynalov Bakı şəhəri Qaradağ Rayon Məhkəməsinə şikayət verib və işə hakim Şəfa Dadaşovanın sədrliyi ilə baxılacaq. 

Protokol qüvvədə saxlanılarsa Aqil Zeynalov (İXM-nin 199 maddəsinə əsasən İşəgötürən tərəfindən işçilərin iş yerlərində sağlam və təhlükəsiz əməyin mühafizəsi şəraiti ilə təmin edilməsinə və ya kollektiv müqavilələrdə nəzərdə tutulan tədbirlərin yerinə yetirilməməsinə görə) - 700 manatdan 1500 manatadək məbləğdə cərimə ediləcək. 

Məlumat üçün bildirək ki, uzun müddətdir mətbuatda gedən məlumata görə "Yük Taksisi.Az" və “Evakuator.Az” MMC-lərə rəhbərlik edən Aqil Zeynalovun Daxili İşlər Nazirliyinin Baş Dövlət Yol Polisi İdarəsinin rəisi, polis general-mayoru Ramiz Zeynalovun yaxın qohumudur.

Sadiq İsbəndərli