Son günlər ölkə ərazisində hava şəraiti mövsümə uyğun olmayaraq əsasən yağmursuz və isti keçir.

Report.az xəbər verir ki, mövzuya kənd təsərrüfatı mütəxəssisi Mirsahib Zəkiyev münasibət bildirib.

Onun sözlərinə görə, qış aylarında havaların isti keçməsi məhsuldarlığa mənfi təsir edir:

"İsti hava meyvə ağaclarının tez tumurcuqlanmasına gətirib çıxarır. Amma qəfil düşəcək şaxta cücərmiş bitkiləri məhv edə bilər. Məhv olan, çürüyən bitkilərin isə yazda göyərməsi mümkün deyil".

Ekspert, həmçinin qeyd edib ki, havaların belə keçməsinin taxılçılığa da ziyanı var:

“Belə ki, isti hava zərərverici bakteriyaların və gəmiricilərin sayının artmasına şərait yaradır ki, bu da öz növbəsində məhsuldarlığın aşağı düşməsinə səbəb olan amillərdəndir”.

Xatırladaq ki, isti hava şəraitinin sabah da müşahidə olunacağı bildirilir. Fevralın 12-də havanın temperaturunun 23 dərəcəyədək yüksəlməsi proqnozlaşdırılır.