Moldova "Qazprom"a istehlak etdiyi yanacağa görə 709 milyon dollar məbləğində borcunu ödəməyəcək.

Valyuta.az xəbər verir ki, bu barədə "Moldova 1" telekanalına müsahibəsində Moldovanın baş naziri Dorin Recean danışıb.

"Biz bu borcu ödəməyəcəyik", deyə baş nazir bildirib.

Dorin Receanın  sözlərinə görə, "Qazprom" mövcud olmayan borcun ödənilməsi ilə əlavə tədarükləri şərtləndirməyə çalışır.

Bundan əlavə, baş nazir Moldova vətəndaşlarına xəbərdarlıq edib ki, onları çox çətin qış gözləyir. O, birinci risk faktorunu Dnestryanıya qazın nəqlinin mümkün dayandırılması, ikincisini isə əhali üçün qazın qiymətinin artması kimi adlandırıb. Rəsmi həmçinin qeyd edib ki, 300 minə yaxın insanın yaşadığı Dnestryanıya yanacaq tədarükünün dayandırılması humanitar fəlakətlə doludur.

Noyabrın 26-da Moldova baş nazirinin reinteqrasiya məsələləri üzrə müavini Oleq Serebryan bildirib ki, Rusiya Dnestryanıya qaz nəqlini dayandırarsa, bu, bütün Moldova üçün əsl faciə olacaq. Serebryanın sözlərinə görə, hadisələrin belə inkişafının qarşısını almaq üçün mümkün olan hər şeyi etmək lazımdır. "Danışıqlar arzuolunmaz olsa belə, yenə də zəruridir", deyə o, yekunlaşdırıb.

Ertəsi gün Moldovanın energetika naziri Viktor Parlikov bildirib ki, "Qazprom" Ukrayna ərazisindən Dnestryanıya qaz tranzitini saxlamaq üçün Kişinyova Kiyevlə danışıqlar aparmağı təklif edib. O qeyd edib ki, bu, respublika üçün asan ssenari olacaq, lakin qərarın tez qəbulu çətindir.

"Ukrayna Rusiya qazının tranzitini dayandırarsa, Moldova hakimiyyəti Avropa Komissiyasına (AK) müraciət edəcək". Bunu isə "Moldovaqaz" şirkətinin idarə heyətinin sədr müavini Vadim Çeban N4 telekanalının efirində deyib.

"Qeyri-müəyyənlik davam edərsə, Moldova ölkəyə sabit qaz tədarükü üçün kompromis həll yolu tapmaqda kömək üçün Avropa Komissiyasına müraciət etməyə məcbur olacaq", deyə sədr müavini əlavə edib.

Vadim Çeban əlavə edib ki, Moldova Trans-Balkan dəhlizi ilə də alternativ yollar axtaracaq. O qeyd edib ki, "Qazprom", Ukraynanın "Naftoqaz" şirkəti və qaz nəqli sistemlərinin operatorları arasında operator müqavilələrinin imzalanması son dərəcə vacibdir. Bu razılaşmalar olmadan qaz tranzitinin təşkili, o cümlədən Dnestryanı və digər Avropa ölkələrinə tədarük mümkün olmayacaq.

Paşa Məmmədli