ABŞ Aeronavtika və Kosmik Tədqiqatlar Agentliyi (NASA) büdcənin azaldılması səbəbindən “Kaliforniyadakı Jet Propulsion Laboratory”nin (JPL) 530 əməkdaşını işdən çıxarıb.

Bu barədə Valyuta.az Türkiyə mediasına istinadən məlumat verir.

Bildirilib ki, “NASA”-nın saytında dərc edilən açıqlamaya görə, agentlik büdcə kəsirləri səbəbindən 8 faiz kiçilib. Büdcənin kəsilməsinin bir hissəsi olaraq JPL-də 530 işçi ixtisar edilib.

JPL Cənubi Kaliforniya direktoru Laurie Leshin mövzu ilə bağlı verdiyi açıqlamada işdən çıxarma qərarını "kədərli, lakin zəruri" adlandırıb. Leshin bəyan edib ki, büdcənin azaldılmasından sonra xərclərin məhdudlaşdırılması barədə qərar qəbul edilib.

Büdcənin kəsilməsindən təsirlənən və Marsdan qaya və toz nümunələrini toplayaraq Yerə gətirməyi planlaşdıran “Mars Sample Return" (MSR) missiyası diqqət çəkir. Bu missiya NASA-nın insanları Marsa göndərmək üçün hazırlıq prosesini dəstəkləmək məqsədi daşıyır.