Son bir il ərzində Azərbaycan Respublikasından Əfqanıstan İslam Respublikasına 14 milyon 576 min ABŞ dolları həcmində neft və qeyri-neft məhsulları ixrac olunub. 

Valyuta.az rəsmi mənbələrə istinadən xəbər verir ki, ixrac əməliyyatlarının ümumi həcmi 2020-ci ilin iyul ayının 31-dən cari ilin müvafiq dövrünə qədər olan dövrü əhatə edib. 

Bu məhsullar arasında mineral yanacaq, neft və onların qovulma məhsulları (bitum tərkibli maddələr və mineral mumlar) üstünlük təşkil edir. Bu məhsulların ixrac gəlirləri 73 faizlik göstərici ilə 10,62 milyon ABŞ dolları təşkil edib.

Azərbaycan bu ölkəyə həmçinin şəkər və şəkərdən hazırlanan qənnadı məhsulları ixrac edib ki, bu sahədən əldə edilən gəlir 18 faizlik göstərici ilə 2,56 milyon ABŞ dolları olub. 

Ölkəmizdən Əfqanıstana ixrac olunan məhsullar arasında süd məhsulları, eləcə də quş yumurtası, təbii bal, başqa yerdə adı çəkilməyən və təsnif olunmayan heyvan mənşəli ərzaq məhsulları da var. Bu məhsulların ümumi ixrac dəyəri 6,1 faizlik göstərici ilə 892 min ABŞ dolları həcmində olub.

Bu ölkəyə göndərilən neft və qeyri-neft məhsulları arasında taxıldan, undan, nişastadan və ya süddən alınan hazır məhsullar; un-qənnadı məhsulları (2,3 faizlik göstərici ilə 331 min ABŞ dolları), tütün məhsulları (0,76 faizlik göstərici ilə 111 min ABŞ dolları), oduncaq və ondan hazırlanan məmulatlar (0,15 faizlik göstərici ilə 22 min ABŞ dolları) və digər məhsullar olub.

Rövşən Ziya