Hesabat ilində dövlət büdcəsi gəlirlərinin yığılmasını təmin edən Dövlət Gömrük Komitəsinin Hava Nəqliyyatında Baş Gömrük İdarəsində (İdarə) inzibatçılığın təşkili vəziyyətinin auditi aparılıb.

Valyuta.az xəbər verir ki, bu barədə “Azərbaycan Respublikasının 2020-ci il dövlət büdcəsinin icrası haqqında” qanun layihəsinə və 2020-ci il dövlət büdcəsinin icrasına dair illik hesabata Azərbaycan Respublikası Hesablama Palatasının rəyində öz əksini tapıb.

Qeyd olunur ki, audit 2019-cu il və 2020-ci ilin yanvar-aprel aylarını əhatə edib. İdarə tərəfindən qanunvericiliklə müəyyən edilmiş səlahiyyətlər çərçivəsində 2019-cu ildə 436 588 halda 11 milyard 637 milyon 393,6 min manat, 2020-ci ilin yanvar-aprel aylarında isə 115 289 halda 55 milyard 05 milyon 747,0 min manat dəyərində malların və pul vəsaitlərinin rəsmiləşdirilməsi, o cümlədən təkrar rəsmiləşdirilməsi əməliyyatları həyata keçirilib.

Proqnoz hədəflərə 2019-cu ildə 464,7 milyon manat və ya 115,0%, 2020-ci ilin yanvar-aprel ayları üzrə isə 169,7 milyon manat və ya 106,4% səviyyəsində əməl olunub.

Eyni zamanda, 2019-cu il üzrə ümumilikdə artıqlaması ilə icra olunması şəraitində aylıq proqnozlar yanvar ayı üzrə 5,5%, fevral ayı üzrə 15,1% və mart ayı üzrə 6,7%-lik kəsirlə yerinə yetirilib.