İşğaldan azad edilən Hadrut qəsəbəsi fasiləsiz içməli su ilə təmin edilib.

Valyuta.az məlumat verir ki, bunu "Azərsu" ASC-nin mətbuat xidmətinin rəhbəri Anar Cəbrayıllı deyib.

Hadrut qəsəbəsi işğaldan azad olunanda həmin ərazidə içməli su problemi olunduğunu deyən qurum sözçüsü qeyd edib ki, həmin vaxt hərbçilərimizin su təchizatına müəyyən problemlər yaranmışdı: 

“Lakin ötən ilin 10 noyabr tarixində imzalanan 3 tərəfli sazişdən sonra “Azərsu” ASC-nin mütəxəssisləri ərazidəki vəziyyəti qiymətləndirmək üçün Hadruta ezam olundu. Hadrut qəsəbəsinin suyu əsasən bulaqlar vasitəsilə təmin edilirdi. Bulaqlardan su gəlmədiyi üçün təhlükəsizlik məqsədilə ilkin olaraq generatorlar vasitəsilə artezian quyuları işə salındı. Bununla da Hadrutda olan şəxsi heyətin su təhcizatı təmin edildi”. 

A.Cəbrayıllı, daha sonra Müdafiə Nazirliyinin xüsusi nümayəndələri ilə birlikdə mənbəyə baxış keçirdiklərini orada təmizləmə işləri aparıldığını diqqətə çatdırıb:

“Anbarlar əlaqələndirildi, su nümunələri götürülüb yoxlanıldı. Bundan sonra Hadrut qəsəbəsinin fasiləsiz su təhcizatı təmin edildi. Artıq orada olan hərbi hospital və mülki binalar "Azərsu" ASC tərəfindən 24 saat fasiləsiz su ilə təmin olunur”.