Sağlamlıq turizmi bazarının dəyəri 2021-ci ildə 125 milyard ABŞ dollar həcmində olacağı təxmin edilir.

Valyuta.az xəbər verir ki, son 13 ildə sağlamlıq turizmində sürətlə inkişaf edən Hindistan, Kosta Rika, Macarıstan, Türkiyə, Litva, İsrail, İordaniya, Tayland, Malayziya, Cənubi Koreya və Kuba kimi ölkələr siyahıda liderdir.

Dövlət Turizm Agentliyinin hesabatına görə, tədqiqatçılar insanların tibbi xidmətlər üçün hər nəfərə 3000-10000 dollar arasında pul xərclədiklərini qeyd edirlər. 

Qeyd edək ki, sağlamlıq bazarının gəlirləri 2018-ci ildə 4,2 trilyon dollar olub. Qarşıdakı illərdə bu sahədə 6,4%-dən çox inkişafın baş verəcəyi gözlənilir. 

Eyni zamanda, ABŞ-da 3,5 milyard, Avropada 2,5 milyard ABŞ dolları sağlamlıq turizmi xərcləri müəyyən edilib.

Sağlamlıq turizmində inkişaf səviyyəsi və göstərilən tibbi xidmətlərin sayına görə, Amerika qitəsində ABŞ, Braziliya, Kolumbiya, Kosta Rika, Kuba, Meksika, Panama liderdirlər. Avropada Xorvatiya, Macarıstan, İspaniya, Türkiyə, Fransa, Almaniya, Asiyada BƏƏ, İordaniya, Hindistan, Cənubi Koreya, Malayziya, Filippin, Sinqapur və Tayland, Afrikada CAR lider ölkələrdəndir, xarici pasiyentləri daha çox qəbul edir. 

Tədiyə balansında bu sahənin payına görə fərqlənir. Son beş ildə ABŞ, Cənubi Koreya, Türkiyə, Tayland, Malaziya, Hindistanın sağlamlıq turizmindən əldə olunan gəlirləri dinamik olaraq artmaqdadır. Bu da sağlamlıq turizmi sənayesinə yönəldilən investisiyaların artması, yeni infrastruktur sahələrin təşkili, xidmətlərin sayının artırılması və sağlamlıq turizm paketlərinin aktiv olaraq marketinqi ilə bağlıdır. 

Rövşən Ziya