Xorvatiya çoxlu yay kurortlarına malik olması ilə tanınır. 

Valyuta.az "Express"ə istinadən xəbər verir ki, Dubrovnik və Split kimi qış ziyarətçiləri arasında məşhur olan şəhərlər olsa da, daha az araşdırılmış bölgələr var. Bu bölgələrdə böyük izdiham olmadan mənzərəli gözəllikləri görə bilərsiniz.

"VIP Holiday Booker"ə görə, söhbət Xorvatiyanın ən aşağı qiymətli istiqamətlər siyahısında ikinci yeri tutan füsunkar kiçik Korçula adasından gedir.

Ümumilikdə, adada 5 950 nəfər yaşayır. Korçula adasında, həmçinin, Adriatik dənizinin ən təmiz sularından biri yerləşir. Burada çoxlu çınqıllı çimərliklər və sakit, təcrid olunmuş körfəzlər mövcuddur.

Ən məşhur çimərliklərdən bəziləri Lumbarda, Vaja və şəhər yaxınlığında yerləşən Bilin Zal çimərliyidir.

Adanın ərazisi üzüm bağları, zeytun bağları və şam meşələri ilə örtülüdür. Bu səbəbdən təbiətsevərlər üçün əsl cənnət hesab edilir. Bundan əlavə, Korçula adası Adriatik dənizi və ətraf adaların mənzərələrindən həzz almaq üçün piyada və ya velosiped gəzintiləri üçün ideal bir yerdir.

Şəhər Korçulada orta əsrlərə aid şəhər divarları və bir neçə müdafiə qülləsi yerləşir. Ən məşhur qüllə Müqəddəs Blaise qülləsidir və oradan şəhər və dənizin möhtəşəm mənzərəsi açılır.

Turistlər bu adanın gözəlliyindən heyran qalıblar. "Tripadvisor" platformasında adanın piyada gəzintiləri üçün əlverişli olması və tarixi cazibəsi xüsusi vurğulanıb.

"Korçula heyrətamizdir! Günümüzün ən gözəl anı adanı gəzib tanıdığımız an oldu. Hətta öyrəndik ki, Marko Polo (məşhur tacir və səyyah) bəlkə də buradan olub, çünki onun dövründə Korçula Venesiyaya aid idi", deyə bir ziyarətçi qeyd edib.

Başqa bir turist isə yazıb: "Xorvatiya sahilləri yaxınlığında möhtəşəm bir ada. Biz "TP Line" feribotu ilə Dubrovnikdən (iki saat) gəldik. Korçula şəhərinin köhnə hissəsi heyrətamizdir. Daş divarlarla əhatə olunmuş qədim binalar var. Dənizin inanılmaz mənzərəsi və çoxlu kiçik ictimai çimərliklər mövcuddur".

Paşa Məmmədli