Bəzi insanlar fərdi səyahət etməkdən qorxurlar. Bu bəzən dil problemi və tanışlıq məsələsi ilə, bəzən isə digər amillər ilə bağlı olur. Bu səbəbdən tur ilə səyahətə üstünlük verirlər. Bəs həmin şəxslər fərdi səyahət etmək qorxusunu necə dəf etməlidirlər?

Bu barədə Valyuta.az saytına danışan bloger, turizm eksperti Azər İsmayıl bildirib ki, qrup turları ilə səyahət etmək insanların gedəcəkləri yerdə daha səmərəli vaxt keçirməsinə imkan verir: “Çünki, tur bələdçisi onların əvəzinə artıq bütün marşrutlar ilə tanışdır və insanları səyahət edəcəkləri bölgənin ən məşhur, ən turisitik yerlərinə aparır”.

Turizm eksperti fərdi səyahətdən qorxmanın səbəblərini qeyd edib: “Fərdi səyahətdən insanlar ona görə qorxurlar ki, həmin şəxs tək səyahət edən zaman təhlükəsizlik məsələlərindən narahat ola bilər. Fərdi səyahət edən zaman sosial şəbəkələrdən şəhərlərin təhlükəsizlik indeksini araşdırıb, təhlükəsiz şəhərlərə səyahət etməklə başlamaq olar”.

A.İsmayılın fərdi səyahət edəcək şəxslərə tövsiyəsi də var: “Fərdi səyahət qorxusunu dəf etmək üçün təhlükəli şəhərlərə səyahət etməmək və günün qaranlıq vaxtlarında sakit küçələr əvəzinə insanların daha çox toplaşdığı yerləri gəzməyi tövsiyə edirəm”.

Əvəz Həsənov