Azərbaycanda fəaliyyət göstərən hotel və sanatoriyalara bəzi güzəştlər nəzərdə tutulub. Bununla bağlı Vergi Məcəlləsinə dəyişiklik edilib. Dəyişikliyə görə, gələn ilin yanvarından Azərbaycanın regionlarında otel və sanatoriyaların əmlak vergisi 3 il müddətinə 75 faiz azaldılacaq.

Nəzərdə tutulan güzəşt yalnız regiondakı otel və sanatoriyalara aid ediləcək. Bakı, Sumqayıt, Xırdalan şəhərləri və Abşeron rayonu isə istisnadır.

Valyuta.az-a açıqlamasında iqtisadçı ekspert Natiq Cəfərlinin fikrincə, bu addım otellərin vergi ağırlığını azaldacaq:

“Biznes üçün istənilən vergi endirimləri müsbətdir. Amma indiyə kimi əmlak vergisinin nə qədər olduğu barədə hər hansə bir hesablama da aparılmayıb. 75 faizlik güzəşt otel və sanatoriyalara nə qədər qənaət etməyə imkan verəcək. Təəssüf ki, bu rəqəmləri elan etmirlər. Həmin rəqəmlər bəlli olsa, analiz aparıb prosesi daha da aydınlaşdırmaq olar. İstənilən halda əmlak vergisinin azaldılması müsbətdir. Ən azından otellərin vergi öhdəliyi  və ağırlığı azalacaq”. 

Lakin ekspert qeyd edir ki, turizmin inkişafı bir tək bu məsələ ilə həll olunan deyil:

“Quru sərhədlərin bağlı olması turizmə ciddi zərbə vurur. Əsasən də regionlardakı turizmə. Ona görə də tək vergi endirimlərilə turizmi inkişaf etdirmək mümkün deyil. Başqa addımlar da atılmalıdır. Xüsusən də quru sərhədləri açılmalıdır”.

Ramiz