"Azərbaycanın tarixi abidələri bu ölkənin təbii brendidir. Gözəl təbiətimiz isə milli sərvətimizdir”.
 
Bunu Qaynarinfo-ya açıqlamasında iqtisadçı ekspert Akif Nəsirli bu il Avropadan Azərbaycana gələn turistlərin sayının artmasından danışarkən deyib. 

Ekspert bildirib ki, bu brendləri tanıyanlar çoxaldıqca, Azərbaycana səfər etmək istəkləri olan əhalinin sayı çoxalacaq: 

"Ümumiyyətlə, Azərbaycan gəzmək üçün Avropa ölkələrinin maraq dairəsində olan ölkələr siyahısındadır. Avropalılar Azərbaycana yalnız istirahətə gəlmir. Azərbaycana onlar tarixi abidələrini görmək, müəyyən təbiət hadisələrini müşahidə etmək, Xəzər dənizi sahilində olmaq üçün üz tuturlar. Avropalılar üçün Azərbaycanın təbiəti, tarixi abidələri həmişə cəlbedici olub”. 

Ekspert bildirib ki, Avropadan Azərbvaycana turist səfərlərinin sayı artıb:

"Bu il artımın yüksək faizlərlə görünməsinin səbəbi Azərbaycana turist axının azalması ilə bağlıdır”.

Akif Nəsirlinin sözlərinə görə, quru sərhədlər bağlı olduğundan və turist sayı az olduğu üçün Avropadan Azərbaycana gələn turistlərin xüsusi çəkisi çox görsənir, yəni 17 faiz artım var: 

"Əvvəllər Azərbaycana 5-6 milyon turist gəlirdi. Amma indi turist səfərinin sayı 1-2 milyona enib. Buna da səbəb quru sərhədlərin bağlı olmasıdır. Əslində, Avropa ölkələrindən gələn turistlərin Azərbaycan üçün cəlbediciliyi əvvəli dövrlə müqayisədə artmayıb. Turizm elə bir sektordur ki, məsələn, bu gün Almaniyadan Azəraycana 10 turist gəlirsə, onlar yaxşı təəssüratla qayıdırsa, gedərkən bunu 100 nəfərlə bölüşür. Növbəti ildə daha 10-15 nəfər turust gəlir. Bu tendensiya son 15-20 ildə müşahidə edilməkdədir. Avropadan Azərbaycana səfər edənlərin artım tempini ayrıca göstərməyiblər. Ümumi turist axının arasında göstərinlər, ona görə də faiz bir qədər yüksək görsənir”. 

Turistlərin tərkibinə gəlincə, Akif Nəsirli hesab edir ki, Azərbaycan üçün Avropa ölkələrindən gələn turistlərin sayının çoxalması müsbət göstəricidir: 

"Az inkişaf edən və inkişaf etməkdə olan ölkələrdən gələn turistlərlə Avropa ölkələrindən gələn turistlərin fərqi böyükdür. Hər bir avropalı turist Azərbaycana gələrkən digər inkişaf etməkdə olan ölkələrdən gələn turistlərdən 5-10 dəfə daha çox vəsait xərcləyir və ölkəyə daha çox xeyir verir”. 

Akif Nəsirli hesab edir ki, ərəb turistlərinin imkanları Avropa turistlərinin imkanlarından aşağıdır: 

"Avropalılar düşünmür ki, biletlər bahadır, ya ucuz. Quru yol açıq olsa, Gürcüstana gələn turistlərin 70-80 %-i Azərbaycana səfər edər. İndi onlar Azərbaycan əvəzinə Ermənistana səfər edir. Bu il Ermənistana səfər edən avropalı turistlərin sayı 4 dəfə artıb”. 

Qeyd edək ki, Dövlət Sərhəd Xidmətinin məlumatına əsasən, bu ilin ilk 7 ayında Azərbaycana gələn turistlərin sayı əvvəlki ilin uyğun dövrü ilə müqayisədə 37.4 faiz artaraq 1 milyon 143 minə çatıb. Avropalıların sayının artması, ərəb tursitlərinin səfərlərin azalması qeydə alınıb. Belə ki, bu müddətdə MDB ölkələrindən gələnlərin sayı 1,7 dəfə artaraq 477,1 min nəfər, Avropa İttifaqına üzv ölkələrdən gələnlərin sayı 36,5 faiz artaraq 57,2 min nəfər, körfəz ölkələrindən gələnlərin sayı 8,6 faiz azalaraq 185,4 min nəfər olub.