"Nvidia" ("NVDA") 2024-cü ildə əldə etdiyi uğurları 2025-ci ildə də davam etdirmək niyyətindədir. Bu məqsədlə şirkət Las Veqasda keçirilən "CES" sərgisində süni intellekt texnologiyalarına dair bir sıra yeniliklər təqdim edib. 

Valyuta.Az "Yahoo Finance"a istinadla xəbər verir ki, Bazar ertəsi keçirilən tədbirdə şirkətin baş direktoru Censen Xuan (Jensen Huang) səhnəyə çıxaraq robotlar və avtonom avtomobillər üçün süni intellekt proqram təminatından tutmuş, masaüstü formatda yeni süperkompüterlərə qədər geniş bir vizyonunu bölüşüb.  

Təqdimatdan əvvəl "Nvidia"nın səhmləri 4,7% artıb. Şirkətin səhmləri son 12 ayda 205% yüksəlib ki, bu da süni intellekt sahəsindəki yatırımlarının və "CUDA" proqram təminatının uğurunu əks etdirir. "CUDA" inkişaf etdiricilərə "Nvidia" çiplərindən istifadə edərək süni intellekt proqramlarını işlətmək imkanı verir.  

Tədbirdəki təqdimatlar əsasən "Nvidia"nın mövcud "Hopper" və "Blackwell" platformalarını necə istifadə edə biləcəyi ilə bağlı idi. Şirkət növbəti nəsil çipini mart ayında keçiriləcək "GTC" konfransında təqdim etməyi planlaşdırır.  

Censen Xuan "Nvidia"nın ən yeni "Blackwell" əsaslı çipi, "GB10" superçipini təqdim edib. Bu çip "GB200" superçipinin kiçik versiyasıdır və "Grace" mərkəzi prosessorunu ("CPU") iki "Blackwell" qrafik prosessoru ("GPU") ilə birləşdirir. Kiçik "GB10" modeli isə bir "Grace CPU" və bir "Blackwell GPU" ilə təchiz olunub.  

"Nvidia" bildirib ki, bu çip "Project DIGITS" adlı kiçik masaüstü sistemdə təqdim ediləcək. Sistem 128 GB yaddaşa və 4 TB saxlama tutumuna malikdir. Şirkət bu qurğunun tədqiqatçılar üçün geniş süni intellekt modellərinin prototipini hazırlamaq, incələmək və işə salmaq üçün kifayət qədər güclü olduğunu qeyd edir.  

"Project DIGITS" sistemi 3,000 ABŞ dollarından başlayaraq "Nvidia" və "OEM" tərəfdaşları tərəfindən may ayında satışa çıxarılacaq.

"Isaac GROOT Blueprint" proqramı

Şirkət həmçinin "CES 2025" sərgisində süni intellekt texnologiyalarına aid bir sıra yeniliklər təqdim edib. Yeni çip və masaüstü kompüter sistemindən əlavə, şirkət fiziki süni intellekt sistemləri üçün açıq model lisenziyasına malik "Cosmos" platformasını və humanoid robotların təlimini asanlaşdıran "Isaac GROOT Blueprint" proqramını təqdim edib.  

"Cosmos" platforması ilə innovasiyalar

"Cosmos" platforması robotlar və avtonom avtomobillərin proqram təminatını hazırlamaq üçün nəzərdə tutulub. Bu sistem real dünyadakı şərtləri simulyasiya edən dünya əsaslı modellərdən ("World Foundation Models" - "WFMs") istifadə edir. Platforma, tərtibatçılara bahalı robotlardan istifadə etmədən və avtomobilləri real yollara çıxarmadan müxtəlif ssenariləri virtual mühitdə sınamağa imkan verir.  

"Robotlar üçün "ChatGPT" anı yaxınlaşır," deyə "Nvidia"nın baş direktoru Censen Xuan qeyd edib. O vurğulayıb ki, iri dil modelləri kimi dünya əsaslı modellər də robot və avtonom avtomobil texnologiyalarının inkişafında mühüm rol oynayacaq. "Biz 'Cosmos'u fiziki süni intellekti demokratikləşdirmək məqsədilə yaratdıq," deyə o əlavə edib.  

Avtomobil sektoru və əməkdaşlıqlar

Avtomobil sahəsində şirkət "Toyota", "Continental" və "Aurora" ilə əməkdaşlıq müqavilələri bağlayıb. Toyota, "Nvidia DRIVE AGX Orin" çipini və "DriveOS" əməliyyat sistemini gələcək avtomobillərində inkişaf etmiş sürücü yardım sistemləri üçün istifadə edəcək.  

"Continental" və "Aurora" isə "Nvidia DRIVE" avadanlığı və "DriveOS" proqram təminatını "Aurora Driver" adlı dördüncü səviyyəli avtonom idarəetmə sistemində tətbiq edəcək. Bu sistem əsasında hazırlanan avtonom yük maşınlarının 2027-ci ildən etibarən yollara çıxarılması planlaşdırılır.  

Maliyyə göstəriciləri

"Nvidia"nın avtomobil və robototexnika bölmələri sürətlə böyüsə də, ümumi gəlirə görə data mərkəzi biznesindən geri qalır. 2023-cü ilin III rübündə bu bölmə 449 milyon dollar gəlir əldə edib ki, bu, illik 72%-lik artımı əks etdirir. Lakin bu, şirkətin ümumi 35,1 milyard dollarlıq gəlirində əsas payı təşkil edən data mərkəzi biznesindən (30,8 milyard dollar) xeyli aşağıdır.  

Süni intellekt agentləri: növbəti mərhələ

Süni intellekt agentləri, çoxmərhələli tapşırıqları yerinə yetirmək qabiliyyətinə malik xüsusi proqramlardır. Bu texnologiya, e-poçt məlumatlarının elektron cədvəllərə avtomatik idxalı kimi rutin işlərin avtomatlaşdırılması vasitəsilə məhsuldarlığı artırma potensialına malikdir.  

"Google" və "Microsoft" kimi texnologiya nəhəngləri artıq bu agentləri həm müəssisə, həm də istehlakçı bazarlarında texnoloji transformasiyanın növbəti mərhələsi kimi görürlər. "Nvidia" isə "AI Blueprints" platforması vasitəsilə bu sahədə öz mövqeyini daha da gücləndirir.  

Süni intellektdə innovasiya və liderlik

Bu yeniliklər, "Nvidia"nın süni intellekt sahəsindəki liderliyini daha da möhkəmləndirir. Şirkətin təqdim etdiyi həllər həm fərdi istifadəçilər, həm də korporativ müştərilər üçün məhsuldarlıq və innovasiya imkanlarını artıracaq.

Rəhim