Pekin ABŞ hökumətinin Çin çip sənayesi ilə bağlı sənaye siyasəti və praktikalarına dair təhqiqat başlatması qərarına sərt reaksiya göstərib. 

Valyuta.az xəbər verir ki, Çin Ticarət Nazirliyi bu addımın yalnız qlobal sənaye və təchizat zəncirlərini pozmayacağını, həm də ABŞ şirkətləri və istehlakçılarının maraqlarına zərər verəcəyini bəyan edib.

Çin: "Haqlarımızı qorumaq üçün tədbir alacağıq"

Pekin tərəfindən verilən açıqlamada ABŞ-ın Çin çip sənayesini dövlət dəstəyi ilə gücləndirərək qlobal bazarda üstünlük əldə etməyə çalışdığı iddiaları rədd edilib. Əksinə, Vaşinqtonun "Çip və Elm Qanunu" kimi təşəbbüslərlə öz yerli çip sənayesinə böyük subsidiya təmin etdiyi vurğulanıb.

Açıqlamada həmçinin ABŞ çip istehsalçılarının qlobal bazarın təxminən 50%-ni nəzarətdə saxladığı və Çinin ABŞ-a çip ixracının ABŞ-ın Çinə ixracından daha az olduğu xatırladılıb. Pekin ABŞ-a beynəlxalq ticarət qaydalarına hörmət etməyi və yanlış siyasətinə dərhal son verməyi çağırıb. Çin hökuməti isə öz haqlarını və maraqlarını qorumaq üçün lazım olan bütün tədbirləri görəcəyini bəyan edib.

ABŞ: "Çin rəqabətə zidd siyasətlər yürüdür"

ABŞ Ticarət Nümayəndəliyinin (USTR) verdiyi açıqlamaya görə, təhqiqat Çinin yarımkeçirici sənayesində tətbiq etdiyi yerli və qlobal bazarları nəzarət altına almağa yönəlmiş siyasət və praktikalara yönəlib. USTR Çin hökumətinin özünü təmin etmə və yerliləşdirmə hədəflərinə nail olmaq üçün rəqabətə zidd və bazardan kənar metodlardan istifadə etdiyini iddia edib.

Təhqiqatın istiqamətləri

1974-cü il tarixli ABŞ Ticarət Qanununun 301-ci bölümü çərçivəsində başlanan bu təhqiqatın ilkin mərhələdə Çin çip sənayesində aşağıdakı sahələrə fokuslanacağı bildirilib:

* Müdafiə, avtomobil sənayesi, tibbi cihazlar, aviasiya və telekommunikasiya sahələrində istifadə edilən yarımkeçiricilər;
* Elektrik enerjisi istehsalı və elektrik şəbəkələrində istifadə edilən komponentlər;
* Silisyum karbid alt təbəqələrin istehsalı.

301-ci bölmə ABŞ prezidentinə, beynəlxalq qanun pozuntusu səbəbindən xarici hökumətin siyasət və ya praktikalarına cavab olaraq tariflər və digər sanksiyalar tətbiq etmək səlahiyyəti verir.

Paşa Məmmədli