"Tesla"nın səhmləri çərşənbə günü 8 faizdən çox ucuzlaşaraq, ABŞ-da keçirilmiş seçkilərdən sonra qazandığı bir sıra üstünlükləri itirib. Bu eniş, şirkətin Donald Trampın seçki qələbəsindən əvvəl yaşadığı ən böyük qiymət azalması olub.

Valyuta.az xəbər verir ki, "Tesla"nın səhmləri son altı həftədə 75 faiz artaraq 11 dekabrda tarixi maksimum səviyyəsinə çatmış və 2021-ci ildəki rekord göstəricisini yeniləmişdi.

"Barclays" analitiklərinin yaydığı hesabatda qeyd edilir: "Görüşdüyümüz əksər investorlar, "Tesla" səhmlərinin sürətli enişi qarşısında çaşqınlıq içindədirlər".

Son həftələrdə "Tesla"nın səhmləri yeni rekord səviyyəyə çataraq dekabrın 11-də ən yüksək qapanış qiyməti olan 479,86 dollara qədər yüksəlmişdi. Lakin çərşənbə günü baş verən eniş, texnologiya sahəsindəki "Nasdaq" indeksinin 3,6 faiz ucuzlaşdığı və ilin ikinci ən pis gününü yaşadığı vaxtla üst-üstə düşüb..

Trampın kampaniyasına 277 milyon dollar dəstək

"Tesla"nın baş icraçı direktoru İlon Mask ABŞ-da keçirilmiş seçkilərdə Donald Trampa böyük maliyyə dəstək verərək 277 milyon dollar ianə etmişdi. Bu məlumat ABŞ Federal Seçki Komissiyasının sənədlərində qeyd olunub.

İlon Maskın Trampın rəhbərliyi altında Dövlət Effektivliyi Departamentinə rəhbərlik edəcəyi gözlənilir. Bu departamentin federal idarələrin xərclərinin azaldılması və normativlərin yüngülləşdirilməsi sahəsində mühüm rol oynaması nəzərdə tutulur.

Maskın Tramp ilə əlaqələri

"Tesla"nın və "SpaceX"in rəhbəri olan Mask oktyabr ayında verdiyi açıqlamada Trampla olan əməkdaşlığını "avtonom avtomobillər üçün federal təsdiq prosesinin" yaradılmasında istifadə etmək niyyətində olduğunu bildirmişdi.

"Tesla" hələ də sürücüsüz taksilər və bu xidmətlərə dair kommersiya tətbiqləri ilə bazara çıxmasa da, ABŞ-ın əsas rəqibi "Waymo" bildirib ki, 2024-cü ildə 4 milyondan çox pullu robotaksi səyahəti həyata keçirib.

"Barclays" analitikləri qeyd edir: "Tesla Maskın yeganə ictimai şirkətidir və çox vaxt Maskın şəxsi xarizmasının təcəssümü kimi qiymətləndirilir. Bu vəziyyət "Tesla" səhmlərində riskləri artırır".

Seçicilər Maskın idarəetmədə rol almasını istəmirlər

ABŞ-da Quinnipiac Universitetinin apardığı sorğu göstərib ki, seçicilərin 53 faizi Maskın Tramp administrasiyasında əsas rol almasını dəstəkləmir. Demokrat seçicilər arasında bu göstərici cəmi 5 faiz təşkil edib.

"Tesla"nın dördüncü rüb üzrə hesabatını yanvar ayında təqdim edəcəyi gözlənilir. Şirkət , noyabr ayında təqdimatına başlanan "Cybertruck" modelindən sonra yeni modellərlə bazarda iştirakını genişləndirmək niyyətindədir.

Paşa Məmmədli