İndoneziya "Apple" şirkətinin son istehsalı olan "iPhone 16" modellərinin ölkədə satışına və istismarına qadağa qoyub.

Valyuta.Az xəbər verir ki, bu barədə ölkənin sənaye və ticarət naziri Aqus Qumivanq Kartasasmita açıqlama verib.

Nazir ölkədə "iPhone 16"dan istifadənin qanunsuz olduğunu bildirib və vətəndaşlarına xaricdən məhsul almamaları barədə xəbərdarlıq edib.

"İndoneziyada işləyə bilən "iPhone 16" varsa, bu, cihazın qeyri-qanuni olması deməkdir. Bunu bizə bildirin", deyə Kartasasmita qeyd edib. 

Nazir əlavə edib ki, bu cihazlar üçün IMEI sertifikatı yoxdur.

Bəs "iPhone 16"nın satışı niyə qadağan edilib?

Qadağa "Apple"ın İndoneziyaya verdiyi investisiya vədlərinin yerinə yetirilməməsindən sonra qoyulub. Texnologiya nəhənginin ölkəyə vəd etdiyi təqribən 110 milyon dollarlıq sərmayənin təxminən 95 milyonunu reallaşdırdığı, qalan təxminən 15 milyon dollarının isə edilmədiyi bildirilir.

"Sənaye Nazirliyi olaraq "iPhone 16" üçün tələb olunan icazələri verə bilmədik, çünki "Apple"ın yerinə yetirəcəyi vədləri var", deyə Kartasismita qeyd edib.

Nazir bu ayın əvvəlində demişdi: "Apple" "iPhone 16" ölkəmizdə satıla bilməz, çünki TKDN sertifikatı hələ gözlənilmir, "Apple"ın sərmayəsi reallaşmağı gözləyir".

TKDN sertifikatı şirkətlərdən məhsullarını İndoneziyada satmaq üçün 40 faiz yerli məzmun dəyərinə cavab vermələrini tələb edir. Sertifikatlaşdırma prosesi birbaşa "Apple"ın tədqiqat və təkmilləşdirmə obyektləri yaratması ilə bağlıdır. Sözügedən obyektlər "Apple Academies" adlanır.

Bu açıqlama "Apple" şirkətinin baş direktoru Tim Kukun aprel ayında Cakartaya səfərinə baxmayaraq verilib. Kuk prezident Coko Vidodo ilə mümkün istehsal planlarını müzakirə edib və sonra şirkətin İndoneziyada istehsal müəssisələrinin yaradılması imkanlarını qiymətləndirəcəyini bildirib.

Sentyabrın 20-də satışa çıxarılan "iPhone 16" ilə yanaşı, ölkədə "iPhone 16 Pro" və "Apple Watch Series 10" cihazları da İndoneziyada satıla bilməz.

Sənaye Nazirliyinin sözçüsü Febri Hendri Antoni Arif "iPhone 16" üçün TKDN sertifikatlaşdırma prosesinin davam etdiyini bildirib, lakin bunun "Apple"ın investisiya öhdəliklərini yerinə yetirməsindən asılı olduğunu vurğulayıb.

© Qaynarinfo