İnvestisiya firması BlackRock və texnologiya nəhəngi Microsoft məlumat mərkəzlərinin və enerji layihələrinin tikintisi də daxil olmaqla, süni intellekt (AI) texnologiyaları ilə bağlı infrastrukturun inkişafına sərmayə qoymaq üçün dəyəri 30 milyard dollardan çox olan fond yaratmağı planlaşdırır. 

Valyuta.az xəbər verir ki, bu barədə Reuters yazır.

Xəbərə görə, fond Qlobal AI İnfrastruktur İnvestisiya Tərəfdaşlığı adlanacaq və onun yaradılmasında məqsəd “AI sahəsində təchizat zəncirlərini təkmilləşdirmək və [bu cür layihələri] enerji ilə təmin etmək” olacaq. Belə investisiya alətinin yaradılması qərarının arxasında böyük həcmli məlumatların emalı üçün istifadə edilən müasir süni intellekt modellərinin xüsusiyyətləri dayanır: onların işləməsi çox vaxt əhəmiyyətli hesablama gücü tələb edir ki, bu da enerji sərfiyyatının artması ilə nəticələnir. Reuters agentliyinin məlumatına görə, fondun baş tərəfdaşı BƏƏ-nin MGX investisiya şirkəti olacaq və onun yaradılmasında çip istehsalçısı Nvidia da iştirak edəcək. Fondun ümumi investisiya potensialı 100 milyard dollar həcmində qiymətləndirilir.

Sentyabrın 4-də NASDAQ birjasında Nvidia səhmləri gün ərzində 9,5% ucuzlaşaraq onun kapitallaşmasını rekord həddə - 278,9 milyard dollar azaldıb. Bloomberg-in məlumatına görə, bu, süni intellektin inkişafı ilə məşğul olan şirkətlərin həddən artıq “qızmış” bazarında investorların inamının azalması fonunda baş verib. BlackRock Investment-in rəhbəri Jean Boueven AI investorların gözlədiyi dəyəri çatdırmağa başlamazdan əvvəl "səbr tələb olunacağını" söyləyib, bu proses "kvartal deyil, illər çəkəcək". 

Nicat