Kompüter istifadəçiləri köhnə əməliyyat sistemlərinin xeyrinə hazırkı "Windows 11"dən imtina edirlər. 

Valyuta.az xəbər verir ki, bu barədə "Neowin" portalı "Statcounter" analitiklərinin araşdırmasına istinadən məlumat yayıb.

Analitiklər "Windows 11" istifadəçilərinin sayında azalma və eyni zamanda "Windows 10" sistemində artımı müəyyən ediblər. Mütəxəssislər bunu "Windows 11"in aqressiv reklamı ilə əlaqələndirirlər ki, bu da görünür, əks effektə gətirib çıxarıb.

"Statcounter"in məlumatına görə, "Windows 11"in payı yanvarda 28,18%-lə çox yüksək olub, fevralda isə 26,72%-ə düşüb. Eyni zamanda, "Windows 10" fevralda 69,04%, yanvarda isə 67,23%-lik göstərici əldə edib. Fevralda "Windows 7" 3,04%, "Windows 8.1" 0,44%, "Windows XP" isə 0,39% təşkil edib.

Dəyişikliklər cüzi görünsə də, "Windows"un geniş yayılmasını nəzərə alaraq qlobal səviyyədə əhəmiyyətli sayda istifadəçini ifadə edə bilər. "Windows 10" üçün rəsmi dəstək 2025-ci ilin oktyabrında başa çatacaq.

Paşa Məmmədli