"Samsung" "One UI 6.1" yeniləməsini mart ayının sonunda 2023 "Galaxy" cihazlarına yaymağa başlayacağını açıqlayıb. 

Valyuta.az "9to5Google" portalına istinadən xəbər verir ki, yeni proqram təminatı ilə şirkətin smartfon və planşetləri "Galaxy AI"nin neyron şəbəkəsi funksiyalarına çıxış əldə edəcək.

"Samsung Galaxy" S23, S23+, S23 Ultra, S23 FE, Z Fold 5, Z Flip 5, "Galaxy" Tab S9, Tab S9+ və Tab S9 Ultra sahibləri yeniləməni alacaqlar. Yeniləmə yeni "Galaxy" S24 seriyası smartfonları ilə debüt edən "Galaxy AI" xüsusiyyətlərini bu cihazlara gətirəcək.

"Galaxy AI" funksiyaları arasında "Samsung" klaviaturasında yazılan mətni bir neçə üslubda yenidən yaza və xətaları düzəldə bilən "Ton" dəyişdirmə funksiyası fərqlənir. Qeydlər aparan "Samsung Notes" proqramında süni intellekt mətni strukturlaşdırmağa, səhvləri düzəltməyə və məlumat verməyə kömək edir. "Ağıllı" səs yazıcısı isə öz növbəsində səs yazılarını köçürməyə qadirdir.

Ən diqqətçəkən yeniliklərdən biri telefon danışığı zamanı ikitərəfli tərcümədir (səs və mətn). Bununla belə, funksiya hələ rus dilini dəstəkləmir. Bu və bir çox digər funksiyalar, o cümlədən "Circle Search", "Chat Assist", "Generative Edit", "Instant Slow-Mo" mart ayının sonunda "Samsung" smartfon və planşetlərində görünəcək. Bununla belə, "One UI 6.1" yeniləməsinin daha dəqiq buraxılış tarixləri açıqlanmayıb.

Paşa Məmmədli