Texnologiya nəhəngi "Google" və ətraf mühit təşkilatı Ətraf Mühitin Müdafiəsi Fondu (EDF) qlobal istiləşməni sürətləndirən güclü istixana qazı olan metan emissiyalarının mənbələrini müəyyən etmək üçün ortaqlıq elan ediblər. 

Valyuta.az xəbər verir ki, bu barədə rəsmi "Google" bloqunda məlumat verilib.

Layihə çərçivəsində metan sızmalarını izləmək üçün nəzərdə tutulmuş bir neçə "MethanSAT" peykindən biri 2024-cü ilin mart ayında orbitə buraxılacaq.

"Google" informasiyanın emalı üçün hesablama gücünü təmin edəcək, həmçinin infrastrukturu - boru kəmərlərini, yanacaq çənlərini və s.-ni avtomatik müəyyən etmək üçün süni intellektdən istifadə edərək neft və qaz obyektlərinin xəritəsini çəkəcək. Bu, qazın ən çox hansı qovşaqlarda sızdığını anlamağa kömək edəcək.

"İnfrastrukturun tam xəritəsini əldə etdikdən sonra metanın haradan gəldiyini göstərən "MethanSAT" məlumatlarını üst-üstə qoya bilərik. İki xəritə birləşdirildikdə, emissiyaların xüsusi infrastruktura necə uyğun gəldiyini görə bilərik və adətən metan sızmalarına ən çox töhfə verən mənbələrin növlərini daha yaxşı başa düşə bilərik. Bu məlumat adətən sızmalara ən çox həssas olan neft və qaz infrastrukturunda emissiyaların proqnozlaşdırılması və azaldılması üçün inanılmaz dərəcədə dəyərlidir", deyə "Google" bildirib.

Peyk metan monitorinqi məlumatları "Google Earth Engine" geodata analiz platformasında ictimaiyyətə açıq olacaq.

Paşa Məmmədli