“Meta” şirkətinin rəhbəri Mark Zukerberq özünün 500 dollara başa gələn "Quest 3" qulaqcıqları ilə müqayisədə qiyməti 3,5 min dollardan başlayan “Apple Vision Pro” qulaqcıqları haqqında fikirlərini bildirib. 

Valyuta.az "MacRumors"a istinadən xəbər verir ki, Zukerberqin sözlərinə görə, "Quest 3" qarışıq reallıq istifadəçiləri üçün vacib olan əksər sahələrdə "Vision Pro"dan üstündür.

Zukerberq bildirib ki, "Quest 3"ün "Vision Pro"dan üstün cəhətləri arasında daha münasib qiymətini qeyd edib. "Apple"ın aparatının qiyməti "Quest 3"dən 7 dəfə bahadır. O, həmçinin qeyd edib ki, "Quest 3" "Vision Pro"dan 120 qram azdır və dəbilqəni idarə etmək üçün naqillərə ehtiyac yoxdur. Bundan əlavə, "Quest" 3 daha geniş baxış sahəsinə, daha parlaq ekrana və hərəkət bulanıqlığına malik deyil.

Eyni zamanda, milyarderin sözlərinə görə, "Quest 3" əl ilə idarəetmə ilə yanaşı, virtual məkanla qarşılıqlı əlaqəni asanlaşdıran və daha dəqiq nəzarəti təmin edən kontrollerləri dəstəkləyir. Nəhayət, "Quest 3"ün kitabxanasında "Vision Pro"da olmayan "YouTube" və "Xbox" dəstəyi də daxil olmaqla daha çox proqram və oyun var.

Zukerberq etiraf edib ki, "Apple"ın "Quest 3"dən daha yüksək ekran ayırdetmə qabiliyyətinə nail olmaq üçün bu qədər güzəştə getməsi onu təəccübləndirib. Lakin bu prosesdə rahatlıq, erqonomika və funksionallıq kimi digər aspektlər əziyyət çəkir.

Paşa Məmmədli