"The New York Times" nəşri "OpenAI" və "Microsoft"a qarşı iddia qaldıraraq, onların yazılarının icazəsiz istifadə edildiyini və müəllif hüquqlarının süni intellekt texnologiyalarının öyrədilməsi məqsədilə pozulduğunu iddia edib.

Valyuta.az xəbər verir ki, Nyu-Yorkun Cənub Məhkəməsində qaldırılan iddiada “The New York Times” qəzetində dərc olunan milyonlarla məqalənin hazırda etibarlı məlumat mənbələri olan xəbər təşkilatları ilə rəqabət aparan "chatbot"ların hazırlanması üçün istifadə olunduğu iddia edilir. Beləliklə, "The New York Times" "ChatGPT" və digər məşhur süni intellekt platformalarının tərtibatçısı olan şirkətləri müəllif hüquqları ilə bağlı məhkəməyə verən ilk böyük media təşkilatı ünvanına yiyələnib.

Şikayətdə cavabdehlərin qəzetdəki məqalələrin qanunsuz şəkildə surətinin çıxarılması və istifadəsi ilə bağlı milyardlarla dollarlıq qanuni və faktiki ziyana görə məsuliyyət daşıması lazım olduğu bildirilib. Həmçinin şirkətləri bütün "chatbot" modellərini və qəzetin müəllif hüquqları ilə qorunan əsərlərindən istifadə edən təlim məlumatlarını yığışdırmağa çağırıb. "OpenAI" və "Microsoft"un "The New York Times"ın məzmunundan pulsuz istifadə edərək qəzeti əvəzləyəcək məhsullar yaratmaqda günahlandıran şikayətdə, müttəhimlərin "The Times"ın jurnalistikasına etdiyi böyük sərmayədən pulsuz faydalanmağa çalışdıqları bildirilib.

Qəzetin şikayətində deyilir: “The Times” və digər xəbər təşkilatları müstəqil jurnalistikasını qorumasalar, heç bir kompüter və ya süni intellektin doldura bilməyəcəyi boşluq yaranacaq”.

Elmir