"iPhone 15" seriyalı smartfonlar 5G şəbəkələrində keçən ilki modellər və "Samsung"un qatlana bilən modelləri ilə müqayisədə daha yaxşı performans nümayiş etdirir. 

Valyuta.az xəbər verir ki, bu barədə "Ookla" şirkətinin araşdırmasında deyilir.

Beləliklə, "iPhone 15", "iPhone 14 Pro" və "iPhone 14 Pro Max"ın üstünlüyə malik olduğu Cənubi Koreya və Vyetnam istisna olmaqla, əksər regionlarda yükləmə sürətinə görə lider olub. Bu, əvvəlki ilə müqayisədə yeni "iPhone 15" xəttinin performansının əhəmiyyətli dərəcədə yaxşılaşdığını göstərir. Məsələn, "iPhone 15 Plus" "iPhone 14 Plus"dan 54% daha sürətli yükləmə sürətinə sahibdir.

"Samsung" smartfonları da 5G şəbəkələrində yüksək yükləmə sürəti nümayiş etdirib. Qatlanan "Galaxy Z Flip5" və "Galaxy Z Fold5" modelləri öz sələflərini müvafiq olaraq 15% və 10% üstələyib. Lakin bu baxımdan onlar bütün "iPhone 15" xəttindən geridə qalıb.

Mütəxəssislər dünyanın 13 regionundan məlumatları təhlil edərək ən son nəsil flaqman "iPhone", "Samsung Galaxy Z Fold" və "Samsung Galaxy Flip" modellərində yükləmə sürətlərini müqayisə ediblər. Qeyd olunur ki, verilən qiymətlər 2023-cü ilin üçüncü rübündə keçirilən sınaq nəticələrinə əsasən götürülüb.

Paşa Məmmədli