Kaliforniyada meşə yanğınlarını erkən aşkar etmək üçün süni intellekt öyrədilir. 

Valyuta.az xəbər verir ki, indiyədək 77 meşə yanğınını aşkar edən sistem, təxminən 40 faiz müvəffəqiyyət nisbətinə nail olub. İqlim dəyişikliyi nəticəsində meşə yanğınlarının yayılması və şiddəti artıb. Elm adamları təcili tədbirlər görülməyəcəyi təqdirdə, bu təhlükələrin daha da artacağını gözləyirlər. Yanğınlar meşə ekosistemləri, eləcə də yüksək riskli kənd yerləri üçün xüsusi təhlükə yaradır. Sağlamlıq, təhlükəsizlik, meşə təsərrüfatı, təbii fəlakət və fövqəladə hallara yardım agentlikləri, həmçinin digər ehtiyat tədbirlər də bəzən yanğınlarla mübarizə üçün kifayət etmir.

Kaliforniyanın əsas yanğınsöndürmə agentliyi “Cal Fire” 1039 ədəd yüksək ayırdetmə kamerası şəbəkəsindən istifadə edərək meşə yanğınlarının vizual əlamətlərini aşkarlamaq üçün süni intellekt modellərini öyrədir. Sistem tüstü əlamətləri aşkar etdikdə yanğınsöndürənləri yaranan təhlükələr barədə xəbərdar edir.

“Cal Fire”in kəşfiyyat rəhbəri Filip SeLeque bildirib ki, yeni süni intellekt sistemi nəinki cavab müddətini qısaldır, həm də bəzi yanğınları erkən aşkarlayır və onlarla mübarizə aparmağa imkan verir. Süni intellekt sistemi Kaliforniyanın yanğına meyilli ərazilərinin təxminən 90 faizini əhatə edən kameralardan hər dəqiqə milyardlarla meqapiksel təsvirləri emal edir. 

Birləşmiş Millətlər Təşkilatının Ətraf Mühit Proqramının məlumatına görə, meşə yanğınları 2030-cu ilə qədər 14%, 2050-ci ilə qədər 30% və 2100-cü ilə qədər 50% artacaq. Bu səbəbdən artıq bir çox ölkələr yanğınlarla mübarizədə süni intellektdən istifadə etmək üçün işə başlayıblar.

Məsələn, ABŞ-də “Dashboard AI” adlı meşə yanğınlarını aşkarlaya və yerli yanğınsöndürənlərə xəbərdarlıq göndərə bilən texnologiya üçün 17 milyon dollar artım kapitalı toplanıb. “Dashboard AI”yə dağların zirvəsində quraşdırılmış yüksək ayırdetmə qabiliyyətinə malik kameralar daxildir. Hansı ki, onlar mənzərəni skan edir. O, tüstü və ya yanğınları aşkarlamaq üçün bu görüntüləri yoxlayaraq yanğınsöndürənləri dəqiqələr ərzində xəbərdar edə bilər.

“Pano AI” adlı süni intellektin isə hazırda ABŞ-ın Kaliforniya, Kolorado, Oreqon, Vaşinqton, Aydaho və Montana ştatlarında 6 milyon hektardan çox əraziyə xidmət etdiyi bildirilir. “Dashboard AI”dən başqa, bir çox şirkət artıq yanğınsöndürmə üçün süni intellekt öyrətməyə başlayıb.

Elmir