Mobil köməkçi texnologiyalar üzrə ixtisaslaşan Amerikanın "RAZ Mobility" şirkəti görmə məhdudiyyəti olan insanlar üçün xüsusi olaraq hazırlanmış "SmartVision" 3 smartfonunu təqdim edib. 

Valyuta.az xəbər verir ki, “Android Authority” portalının məlumatına görə, qurğu “Android” əməliyyat sistemində işləyir və özündə sensor ekranı və fiziki klaviaturanı birləşdirir.

"SmartVision 3" kor və görmə qabiliyyəti zəif olan istifadəçilərin rahatlığı və təhlükəsizliyi üçün nəzərdə tutulmuş bir sıra funksiyalarla təchiz edilib. Məsələn, onun "Google Assistant" səs köməkçisinə zəng etmək üçün xüsusi düyməsi var ki, bu da telefonunuzu səsinizlə idarə etməyə və mətn daxil etməyə imkan verir. Həmçinin, smartfon əskinasların nominalını, rənglərini, işıqlandırma səviyyələrini müəyyən etməyə və ekrandakı təsviri böyütməyə kömək edən proqramlarla gəlir.

Bundan əlavə, "SmartVision 3" cihazla birlikdə gələn xüsusi NFC teqlərindən istifadə edərək obyektləri tanıya və hərəkətlər edə bilər. Telefonu doldurmaq üçün toxunma işarələri olan simsiz şarj cihazı verilir.

Smartfon 3,5 düymlük sensor ekranla və T9 klaviaturası ilə kompakt dizayn edilib. Qurğunun arxa tərəfində barmaq izi skaneri, 16 və 2 meqapiksellik iki kamera, qarşısında isə 5 meqapiksellik selfi sensoru var. 

"SmartVision 3" ABŞ-da 530 dollara əsas paketdə satılır və tam simsiz şarj cihazı, qutu, qoruyucu film, kəmər, həmçinin əvvəlcədən quraşdırılmış GPS proqramı, elektron kitab və sənəd oxuyucusu ilə birlikdə 600 dollara başa gəlir.

Paşa Məmmədli