Böyük Britaniyada Kardiff Universitetinin nəzdində fəaliyyət göstərən "Demans" Araşdırma İnstitutunun tədqiqatçıları ağıllı saatların Parkinson xəstəliyinin erkən diaqnozunda mühüm rol oynaya biləcəyini ortaya çıxarıb.

Valyuta.az xəbər verir ki, İngiltərədə aparılan bir araşdırma iştirakçılar tərəfindən istifadə edilən ağıllı saatların 7 il əvvələ qədər Parkinson xəstəliyinə diaqnoz qoymağa kömək edə biləcəyinin mümkünlüyünü göstərib. "Sky News"in xəbərinə görə, sözügedən institutun tədqiqatçıları ağıllı saatların Parkinson xəstəliyinin erkən diaqnozunda mühüm rol oynaya biləcəyini müəyyən ediblər. İngiltərədə təxminən yarım milyon insanın sağlamlıq məlumatlarını ehtiva edən "Biobank" adlı biotibbi məlumat bazasından istifadə olunan araşdırmada məlumatlar süni zəka ilə təhlil edilib.

Araşdırmada, 2013-2016 dövründə bir həftə ağıllı saat taxan 103 min 712 adamın hərəkət sürəti izlənilib. Sözügedən dövrdən sonrakı yeddi il ərzində Parkinson xəstəliyi diaqnozu qoyulan iştirakçıların ağıllı saatlarından əldə edilən məlumatlar daha əvvəl eyni xəstəlik diaqnozu qoyulanlarla müqayisə olunub. Müqayisə zamanı Parkinson xəstəliyinə tutulan və yeddi il ərzində bu xəstəliyin aşkarlandığı insanların hərəkətlərinin sağlam fərdlərə nisbətən daha yavaş olduğu müəyyən edilmişdir. Sonrakı illərdə Parkinson xəstəliyi diaqnozu qoyulanların məlumatlarının sağlam insanlarınkından fərqli olması onun əlamətlərinin yeddi il əvvələ qədər müəyyən edilə biləcəyini ortaya qoyub.

Kardiff Universitetinin aparıcı tədqiqatçısı Sintiya Sandor, verdiyi açıqlamada, iştirakçılardan əldə edilən bir həftəlik məlumatlar sayəsində insanların sağlamlıq vəziyyəti ilə bağlı uzunmüddətli proqnozlar verilə biləcəyini qeyd edib. Kəşflər sayəsində Parkinson xəstəliyinin erkən diaqnozu üçün etibarlı və əlverişli bir üsul tapa biləcəklərini söyləyən Sandor, tibbi müşahidə üçün hərəkətizləmə cihazları və ağıllı saatların istifadə edilə biləcəyini vurğuladı.

Başqa bir tədqiqatçı Katrin Pill, Parkinson xəstəliyinə işarə edən məlumatların, digər neyrodegenerativ xəstəliklər və irəli yaş kimi hərəkət sürətinə təsir edən amillərlə bağlı məlumatlardan fərqləndirilə biləcəyini ifadə etdi. Pill, araşdırmanın Parkinson xəstəliyinin gedişatını yavaşladacaq yeni müalicə üsullarının inkişafı və diaqnozda süni intellektin istifadəsinə ümid verdiyini vurğuladı. Alzeymerdən sonra dünyada ən çox yayılmış neyrodegenerativ xəstəliklərdən biri olan Parkinson son statistikalara görə 10 milyona yaxın insanın həyatına təsir edib.

Araşdırma "Nature Medicine" jurnalında dərc olunub.

Elmir