Fövqəladə Hallar Nazirliyi (FHN) Tikintidə Təhlükəsizliyə Nəzarət Dövlət Agentliyinin Tikilməkdə olan Obyektlərin Birləşmiş Müdriyyətinin keçirdiyi tender müsabiqəsinə yekun vurulub.

Valyuta.az-ın xəbərinə görə, tender Astara və Lerikdə 3 ədəd 2 otaqlı evin tikilməsi, Lerikdə 9 ədəd 3 otaqlı evin tikilməsi, Astarada, Maşğan kəndində fərdi yaşayış evinin bərpası, Lomin kəndində fərdi yaşayış evinin təmiri, Lerikdə, Hamarmeşə kəndinə fərdi yaşayış evinin istinad divarlarının çəkilməsi, Çayrud kəndində fərdi yaşayış evinin təmiri və istinad divarlarının çəkilməsi ilə bağlıdır.

Tenderin qalibi “Təməl Tikinti” MMC olub. Şirkətlə bir milyon 145 min 659 manat 46 qəpiklik müqavilə imzalanıb.

Qeyd edək ki, “Təməl Tikinti” MMC 2020-ci ildə təsis edilib. Nizamnamə kapitalı 10 manat olan şirkətin hüquqi ünvanı Binəqədi rayonu, Adil Məmmədov 9 mkr, ev 11, m. 83-də yerləşir. MMC-nin qanuni təmsilçisi Abdullayev Bəylər Tanırverdi oğludur. açıq mənbələrdə şirkət və qanuni təmsilçisi haqqında heç bir məlumata rast gəlinmir. 

Mətbuatda olan məlumatlara görə, bu şirkət əsasən FHN Tikintidə Təhlükəsizliyə Nəzarət Dövlət Agentliyinin Tikilməkdə Olan Obyektlərin Birləşmiş Müdriyyətinin tenderlərinin qalibi olur. 

Ötən il "Təməl Tikinti" MMC sözügedən qurumun 6 tenderinin, 2022-ci ildə isə 3 tenderinin qalibi seçilib. Bu tenderlər üzrə satınalma müqavilələrin ümumi maliyyə dəyəri 1 853 090,66 manatdır. 

Tenderlər müxtəlif rayonlarda fərdi evlərin tikintisi ilə bağlı elan edilib. 

Əvəz Həsənov