Ali məktəbə ödənişli əsaslarla daxil olsalar belə, bəzi kateqoriyalara aid olan tələbələr təhsil haqqından azad olunurlar.

Dövlət təhsil müəssisələrinin hər birində bu qayda eyni cür nizamlansa da, özəl universitetlərə hansı tələbələrin təhsil haqqından azad olması məsələsi bir qədər fərqlənir.

Valyuta.az xəbər verir ki, AzEdu.az Təhsil Portalı hansı hallarda tələbələrin  təhsil haqqından azad olunduğu ilə bağlı özəl universitetlərə sorğu ünvanlayıb.

Azərbaycan Universitetinin (AU) mətbuat xidmətindən bildirildi ki, təhsil haqqı məsələləri Azərbaycan Respublikası Nazirlər Kabinetinin 2010-cu il 25 iyun tarixli 120 nömrəli qərarı ilə tənzimlənir:

“Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş; Azərbaycan Respublikasının azadlığı, suverenliyi və ərazi bütövlüyü uğrunda həlak olmuş; Hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların övladlarının təhsil haqqı Azərbaycan Respublikası Nazirlər Kabinetinin 2010-cu il 25 iyun tarixli 120 nömrəli qərarı ilə təsdiq edilmiş təhsil xərcləri miqdarında dövlət büdcəsinin vəsaiti hesabına ödənilir.

Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslərin təhsil müddəti ərzində təhsil haqqı 2023/2024-cü tədris ilindən etibarən Azərbaycan Respublikası Nazirlər Kabinetinin təsdiq etdiyi təhsil xərcləri miqdarında dövlət büdcəsi vəsaiti hesabına ödənilir.

“Təhsil haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanununa əsasən, şəhid ailəsinin üzvlərinin təhsil haqqı tam miqdarda dövlət büdcəsinin vəsaiti hesabına ödənilir.

Hər iki valideynini itirmiş; valideyn himayəsindən məhrum olmuş yaxud bir valideyni vəfat etmiş və o biri valideyni I yaxud II qrup əlil olan 23 yaşınadək tələbələrin təhsi haqqı tam miqdarda dövlət büdcəsinin vəsaiti hesabına ödənilir.

I və II dərəcə əlilliyi olan şəxslər, habelə sağlamlıq imkanları məhdud 18 yaşınadək uşaqların təhsil haqqı tam miqdarda dövlət büdcəsinin vəsaiti hesabına ödənilir.

Bundan əlavə 600 və yuxarı bal toplayaraq ödənişli əsaslarla qəbul olan (hansı ki, Rusiya, Gürcüstan, İran və s. ölkə vətəndaşıdır, orta məktəbi Azərbaycanda oxuyub, DİM qəbul imtahanında iştirak edib, amma əcnəbi vətəndaş olduğu üçün  dövlət sifarişi ilə ödənişsiz oxuya bilmir) tələbələr birinci tədris ili üçün təhsil haqqı ödənişindən tam azaddırlar.

İkinci tədris ilindən etibarən cari semestr üzrə orta müvəffəqiyyət göstəricisi  95 və yuxarı, qiymətləri A/B olduqda təhsil haqqı ödənişindən tam azad olunurlar.

500-599 arası bal toplayaraq ödənişli əsaslarla qəbul olan tələbələrə xüsusi güzəşt tətbiq olunur. Güzəştin növbəti tədris illərində də tətbiqi tələbənin müvəffəqiyyət göstəricilərindən asılıdır”.

Qərbi Kaspi Universitetindən sorğumuza cavab olaraq bildirildi ki, universitet ikinci Qarabağ Müharibəsi dövründə müharibədə iştirak edən tələbələrini təhsil haqqından azad edib:

“Qərbi Kaspi Universitetinin tələbələrinin təxminən 40 faizi dövlət sifarişli yerlərdə, yəni ödənişsiz təhsil alır. Eyni zamanda yüksək bal toplayan tələbələr ödənişsiz təhsil almaq hüququna malikdirlər. Toplanılan baldan asılı olaraq təhsil haqlarında bir sıra digər güzəştlər də nəzərdə tutulur.

Həmçinin, təhsil haqqı dövlət büdcəsi hesabına ödənilən imtiyazlı statusda olan tələblər də ödənişsiz təhsil alır”.

Xəzər Universitetinin mətbuat katibi qeyd etdi ki, universitetimizə qəbul olan tələbələrin 63 faizi dövlət sifarişi ilə təhsil alırlar:

“Şəhid ailə üzvləri bütün ödənişlərdən azaddırlar. Bundan əlavə müharibə veteranları da nəzərdə tutulmuş güzəştlərə sahibdir. Köçkünlər üçün isə hər hansısa bir güzəşt nəzərdə tutulmayıb”. 

Bakı Biznes Universitetinin mətbuat xidmətinin direktoru bildirib ki, qanunvericiliklə nəzərdə tutulmuş halların hər biri universitetdə tətbiq olunur: 

“Təhsil haqqından azad olunan tələbələrə şəhid ailə üzvləri, müharibə veteranları, müharibədə əlilliyi olan, fiziki imkanları məhdud 18 yaşınadək olan, eyni zamanda 18 yaşından sonra I və II qrup əlilliyi müəyyən olunmuş, valideyn himayəsindən məhrum olunmuş şəxslər aiddir”.

Azərbaycan Kooperasiya Universitetindən sorğumuza cavab olaraq bildirildi ki, universitetdə tədris ilini əla qiymətlərlə başa vuran tələbələr təhsil haqqından azad olunur və onlara təqaüd ayırılır:

“Valideynlərini itirmiş və valideyn himayəsindən məhrum olmuş tələbələr, şəhid ailəsinin üzvləri, Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə "Müharibə veteranı" adı almış şəxslər, orqanizmin funksiyalarının 61-100 faiz pozulmasına görə, habelə 18 yaşınadək əlilliyi müəyyən edilmiş şəxslər, Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlilliyi müəyyən edilmiş və Azərbaycan Respublikasının azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların övladları təhsil haqqından azaddırlar”.