2-10 iyul tarixlərində ölkənin 18 müxtəlif şəhər və rayonu üzrə ümumilikdə 39 imtahan mərkəzini əhatə edən müəllimlərin işə qəbulu (MİQ) üzrə müsabiqənin test imtahanları yekunlaşıb.

26-28 iyul tarixlərində isə MİQ-də şəhid ailəsi üzvləri üçün vakansiya seçimi həyata keçirilib.

Nəticələr də artıq şəhid ailəsi üzvləri olan namizədlərin şəxsi səhifəsinə göndərilib.

Ümumilikdə şəhid ailəsi üzvləri olan 39 namizəd müsahibə mərhələsində iştirak hüququ qazanıb.

Bəs, görəsən, digər namizədlər üçün vakansiya seçimi nə vaxt başlayacaq?

Modern.az xəbər verir ki, Məktəbəqədər və Ümumi Təhsil üzrə Dövlət Agentliyindən Azedu.az-a bildirilib ki, Müəllimlərin İşə Qəbulu üzrə müsabiqənin vakansiya seçimi mərhələsi 31 iyul-5 avqust tarixləri arasında keçiriləcək:

"Müsahibə mərhələsi ilə bağlı müəyyən ediləcək tarix barədə məlumat vakansiya seçimi mərhələsi yekunlaşdıqdan sonra elan ediləcək",- deyə agentlikdən qeyd edilib.

Qeyd edək ki, test imtahanında ümumtəhsil proqramı üzrə minimun 34 bal və tədris metodikası üzrə minimum 6 bal olmaqla, ümumi 40 bal və daha yüksək nəticə göstərən namizədlər vakant yerlərin seçiminə buraxılır.

Namizədlər 8 vakant yer seçə bilərlər.

Namizədlərin vakant yerlərə yerləşdirilməsi onların elektron ərizədə qeyd etdikləri ardıcıllığa əsasən aparılır.