Bu ilin yanvar-fevral aylarında Azərbaycanın Türkiyə ilə apardığı ticarət mübadiləsinin həcmi 541,149 mln. ABŞ dolları təşkil edib ki, bu da 2020-ci ilin eyni dövrü ilə müqayisədə 1,2% azdır.

"APA-Economics"in Dövlət Gömrük Komitəsinin hesabatı əsasında apardığı hesablamalarına görə, hesabat dövründə Azərbaycandan Türkiyəyə ixracın həcmi 302,667 mln. dollar təşkil edib ki, bu da 2020-ci ilin eyni dövrü ilə müqayisədə 2,6% azdır. İdxalın həcmi isə 238,483 mln. dollara bərabər olub ki, bu göstərici illik müqayisədə 0,7% artıb.

Nəticədə, 2021-ci ilin yanvar-fevral aylarında 64,184 mln. dollarlıq müsbət saldo yaranıb ki, bu da illik müqayisədə 13,2% azdır.

Qeyd edək ki, 2020-ci ildə Azərbaycanın Türkiyə ilə apardığı ticarət mübadiləsinin həcmi 4,161 mlrd. ABŞ dolları təşkil edib ki, bu da 2019-cu ilə müqayisədə 7,7% azdır.

Xatırladaq ki, Azərbaycan və Türkiyə 2023-cü ildə qarşılıqlı ticarət dövriyyəsinin həcmini 15 mlrd. dollara çatdırmaq niyyətindədir.