2021-ci ilin yanvar ayında dövlət büdcəsinin gəlirləri ötən ilin eyni dövrünə nisbətən 491 milyon manat artaraq 2 milyard 320,9 milyon manata çatıb. 

Valyuta.az xəbər verir ki, bu barədə Dövlət Statistika Komitəsi məlumat yayıb.

Həmin məbləğə dövlət borcu və zəmanəti üzrə öhdəliklərin Təminat Fondunun daxilolmaları da daxildir. 

Daxilolmaların 20,55%-i hüquqi şəxslərin mənfəət (gəlir) vergisi, 19,76%-i əlavə dəyər vergisi, 3,52%-i fiziki şəxslərin gəlir vergisi, 3,51%-i aksizlərin payına düşüb.

Büdcə gəlirlərinin 3,50%-i xarici iqtisadi fəaliyyətlə bağlı vergilər, 1,61%-i sadələşdirilmiş vergi, 1,20%-i vergilərin digər növləri, 46,35%-i isə vergi olmayan gəlirlər hesabına təmin edilib.

Qeyd edək ki, yanvarda bəzi vergi növləri üzrə daxilolmaların həcmində ötən ilin eyni dövrü ilə müqayisədə artım müşahidə edilsə də bəzilərində azalma qaçılmaz olub.

2021-ci ilin ilk ayında əlavə dəyər vergisi, sadələşdirilmiş vergi, yol və mədən vergiləri, eləcə də xarici iqtisadi fəaliyyətlə bağlı olan vergilərin həcmində azalma baş verib.

Ən çox azalma xarici iqtisadi fəaliyyətlə bağlı olan vergilərin məbləğində olub -20,22 milyon manat. 

Əlavə dəyər vergisi isə ötən ilin yanvarı ilə müqayisədə 18,26 milyon azalıb.