Azərbaycanın dövlət və qeyri-dövlət ali təhsil müəssisələrində 2023-2024-cü tədris ilində bakalavriat və magistratura səviyyələrində xarici ölkələrin 6680 vətəndaşı təhsil alıb. Onların 891-i MDB ölkələrinin, 5789-u isə digər ölkələrin payına düşür. Əcnəbi tələbələrin sırasında Türkiyə, Suriya, Pakistan, İran, İraq, Hindistan, Gürcüstan, Qazaxıstan, Rusiya və Çin vətəndaşları üstünlük təşkil edirlər.

Valyuta.az xəbər verir ki, bu məlumat Dövlət Statistika Komitəsinin yenicə çapdan çıxmış “Azərbaycanda təhsil, elm və mədəniyyət-2024” adlı məcmuəsində əks olunub. Məcmuədə bildirilir ki, Azərbaycanın dövlət və qeyri-dövlət ali təhsil müəssisələrində ötən tədris ilində 6223 əcnəbi təhsil alıb. Bu rəqəm 2005/2006-cı tədris ilində isə 3073 nəfər olub. Bu isə ölkəmizin ali məktəblərində təhsil alan əcnəbi tələbələrin sayının artdığını göstərir.

Rəsmi nəşrin 2023-2024-cü tədris ilinin əvvəlinə olan məlumatına görə, xarici ölkələrdə dövlət xətti ilə təhsil alan Azərbaycan vətəndaşlarının sayı 997 nəfər olub. Onların 217-si MDB-yə üzv olan ölkələrdə, 780-i isə digər ölkələrdə təhsil alır.

©Trend