Azərbaycanın açıqladığı rəsmi məlumatlara əsasən ölkəmizə gələn əcnəbilərin 65 faizi turizm məqsədilə, 35 faizi digər məqsədlərlə səfər edən şəxslərdir.

Valyuta.az Sfera.az-a istinadən xəbər verir ki, burada digər məqsəd dedikdə, mövsümi, qısa və ya uzun müddətə işləməyə gələnlər, ictimai nəqliyyat vasitələrinin heyəti, idxal yüklərini daşıyan avtomobillərin sürücüləri və yükləri müşayiət edən şəxslər, xarici ölkələrin səfirliklərində, konsulluqlarında, beynəlxalq təşkilatların nümayəndəliklərində işləyənlər və onlarla birlikdə ölkəmizdə yaşayan ailə üzvləri, təhsil müəssisələrində təhsil alanlar və s. şəxslər daxildir.

Həmçinin bu qrupa məqsədindən asılı olmayaraq ölkəmizə 90 gündən artıq müddətə səfər edən şəxslər də aiddir.

Rəsmi məlumatlardan aydın olur ki, turizm məqsədilə səfər edənlərin payı uzaq ölkələrdən gələnlər arasında yüksəkdir. Digər məqsədlə gələnlərin payı isə qonşu ölkələrin vətəndaşları arasında müşahidə olunur.

İran vətəndaşları Azərbaycana, əsasən, qeyri-turizm məqsədilə səfər edirlər. İrandan gələnlərin 94 faizi ölkəmizə turist kimi gəlməyiblər. 2024-cü ilin yanvar-aprel ayları ərzində İrandan 70,1 min nəfər gəlib ki, onun da 66 mini turist olmayıb.

Türkiyə vətəndaşlarının da çox hissəsi turist kimi səfər etməyiblər. Qardaş ölkədən gələn hər 100 nəfərin 66,5 nəfəri qeyri-turistdir.

Gürcüstandan gələnlərin 56 faizi turizm məqsədilə səfər edib. Bu ölkədən gələn 33,2 min nəfərin 18,6 min nəfəri turist olub.

Rusiyadan qeyri-turist kimi gələnlər isə bütün səfər edənlərin 22 faizini təşkil edib.

Uzaq ölkələrdən ABŞ, Ərəb dövlətlərinin, Avropa ölkələrinin əhalisinin 80 faizindən çoxu bir qayda olaraq turizm məqsədilə Azərbaycana gəlirlər.