2021-ci ilin yanvar-iyun aylarında Azərbaycanda bütün növ nəqliyyat vasitələri ilə 92 milyon 231,4 min ton yük daşınıb ki, bu da 2020-ci ilin 6 ayının göstəricisindən 4,2% azdır. 

Bu barədə Valyuta.az-a Dövlət Statistika Komitəsindən məlumat verilib.

Daşımaların azalması koronavirus pandemiyası və onun yayılmasının qarşısının alınması məqsədilə məhdudiyyətlərin saxlanılması ilə əlaqədardır.

Yük daşımalarının strukturunda 77,5% qeyri-dövlət nəqliyyat müəssisələrinin, 22,5% dövlət sektorunun payına düşüb. Bununla yanaşı, cari ilin 6 ayı ərzində qeyri-dövlət nəqliyyat müəssisələri tərəfindən yük daşımalarının həcmi ötən ilin müvafiq dövrü ilə müqayisədə 5,1% azalıb.

Hesabat dövründə dəmir yolu ilə 7 milyon 214 min ton (tranzit yüklər daxil olmaqla) yük daşınıb ki, bu da ötən ilin müvafiq dövrünün göstəricisindən 0,3% çoxdur.

Dəniz nəqliyyatı ilə 2 milyon 808,6 min ton (azalma 7,9%), avtomobil nəqliyyatı ilə 52 milyon 232,3 min ton (azalma 7,2%), hava nəqliyyatı ilə 227,7 min ton (artım 22,9%) müxtəlif yük daşınıb. Yanvar-iyun aylarında daxili neft kəmərləri vasitəsilə 29 milyon 748,8 min ton neft (artım 0,6%) nəql olunub.

Nəqlin qalan həcmi magistral qaz kəmərlərinin payına düşüb.