2021-ci ilin yanvar-aprel ayları ərzində sərnişin daşımaları əvvəlki ilin eyni dövrü ilə müqayisədə 30,2 faiz azalıb.

Valyuta.az xəbər verir ki, bu dövrdə nəqliyyatçılar 355,8 milyon sərnişinə xidmət göstəriblər. 

Sərnişinlərin 99,8 faizi avtomobil nəqliyyatı, qalan hissəsi isə digər nəqliyyat növləri ilə daşınıb. Sərnişinlərin 92,1 faizi avtobus, 7,9 faizi isə minik taksilərinin xidmətlərindən istifadə edib. Bu da onu göstərir ki, sərnişin dövriyyəsi isə 18,6 faiz azalıb.

Qeyd edək ki, avtomobil nəqliyyatı ilə sərnişin daşımada taksidən istifadə edənlərin faiz nisbəti artsa da, taksi şirkətlərinə sifarişlər azalıb. Çünki ümumilikdə sərnişindaşıma 30 faizə qədər azalıb. 

Valyuta.az xəbər verir ki, Trend.az taksi şirkətləri arasında sorğu aparıb. Məlum olub ki, pandemiya dövründə taksi şirkətlərinin də gəliri 30-40 faiz aşağı düşüb.

“Ümumilikdə taksilərdən istifadə edənlərin faiz nisbətinin artdığı deyilir. Lakin bu, taksi şirkətlərinin gəlirlərinin artmasına səbəb olmayıb, əksinə azalıb. Çünki taksi xidməti göstrən avtomobillərin sayı da xeyli artıb. Belə ki, pandemiya səbəbindən iş yerləri bağlananların əksəriyyəti müvəqqəti olaraq taksi xidməti göstərməklə məşğul olur ki, bu da bazarda təklifi artırmış olub. Misal üçün şadlıq sayarlarında, iri ticarət mərkəzlərində və digər müvəqqəti bağlanan iş yerlərində çalışanların çoxu indi taksi xidməti göstərməklə məşğul olur”, - taksi şirkətlərinin birindən deyilib.