Azərbaycan 2021-ci ilin yanvar-mart aylarında 26 min 277,71 ton “Premium Euro-95” markalı avtomobil benzini idxal edib ki, bu da ötən ilin müvafiq dövrünün göstəricisindən 71,6% çoxdur. 

Valyuta.az Dövlət Statistika Komitəsinə istindən xəbər verir ki, “Premium Euro-95” markalı benzinin idxal həcmi dəyər ifadəsində 16 milyon 781,15 min dollar (artım 45,1%) təşkil edib.

“Hesabat dövründə 15 milyon 142,74 min dollar məbləğində 23 min 721,48 ton “Premium Euro-95” markalı benzin (bütün idxalın 90,3%-i) Rusiyadan idxal edilib. Ötən ilin yanvar-mart ayları ilə müqayisədə Azərbaycan RF-dən benzin idxalını 60,4% artırıb, dəyər ifadəsində artım 36,2% təşkil edib.

Bundan başqa, hesabat dövründə Gürcüstandan 371,85 min dollar dəyərində 559,32 ton, İrandan isə 1 milyon 266,56 min dollar dəyərində 1 milyon 996,91 min ton (miqdar ifadəsində artım 3,8 dəfə, dəyər ifadəsində artım 2,8 dəfə) “Premium Euro-95” markalı benzin idxal edilib. 

2020-ci ilin yanvar-mart aylarında Gürcüstandan idxal həyata keçirilməyib.

Bu ilin yanvar-mart aylarında 562,73 min dollar dəyərində (azalma 12,1%) 718,75 ton (azalma 4%) “Super Euro-98” avtomobil benzini idxal edilib. İdxal Rumıniyadan həyata keçirilib.

2020-ci ildə Azərbaycan 58 milyon 615,07 min dollar dəyərində 96 min 998,93 ton “Premium Euro-95” markalı benzin idxal edib. 

34 milyon 469,77 min dollar dəyərində 56 min 743,48 ton benzin (bütün idxalın 58,5%-i) Rusiyadan idxal edilib.

Ötən il Azərbaycana 2 milyon 96,71 min dollar dəyərində 2 min 654,36 ton “Super Euro-98” markalı benzin idxal edilib.

“Premium Euro-95” və “Super Euro-98” markalı benzin növlərinin Azərbaycana idxalına 2014-cü il aprelin 1-dən başlanılıb.

Hazırda daxili bazarda “Premium Euro-95” markalı benzinin bir litrinin pərakəndə qiyməti 1,25 manat, “Super Euro-98” markalı benzinin bir litrinin pərakəndə qiyməti isə 1,4 manat təşkil edir.