Hazırda Azərbaycanda inkubasiya və akselerasiya proqramları çərçivəsində 65 startap minimal həyat qabiliyyətli məhsul (MVP) səviyyəsinə çatıb.

Trend xəbər verir ki, bunu İnnovasiya və Rəqəmsal İnkişaf Agentliyinin (İRİA) İnvestisiyalar və ekosistemə dəstək şöbəsinin müdiri Ağahüseyn Əhmədov Azərbaycanın Rəqəmsal İnkişaf və Nəqliyyat Nazirliyi yanında İRİA-nın illik fəaliyyətinə həsr olunmuş hesabat tədbirində deyib.

O bildirib ki, ekosistemin əsas məqsədi bazarın tələblərinə cavab verən məhsul və ya xidmətlərin yaradılmasıdır.

“Bunu, əlbəttə ki, startaplar həyata keçirə bilər. Startaplar həm universitetlərdə, həm müstəqil şəkildə, həm də iri korporasiyalar çərçivəsində yaradıla bilər. Lakin onların yaradılması və təşkil edilməsi üçün ekosistemin və onun elementlərinin mövcudluğu vacibdir. Bu elementlər bir neçə kateqoriyaya bölünə bilər: bazarın əlçatanlığı, maliyyə əlçatanlığı, insan kapitalının inkişafı, infrastruktur təminatı və innovativ mədəniyyətin formalaşdırılması”, – deyə A.Əhmədov bildirib.

Onun sözlərinə görə, İRİA bu günə qədər inkubasiya və akselerasiya proqramları, regionlarda innovativ proqramlar, universitet layihələri həyata keçirib və xaricə nümayəndə heyətləri göndərib.

“Bu günə qədər inkubasiya və akselerasiya proqramları çərçivəsində 9 demo-gün təşkil edilib və bu tədbirlərdə 100-dən çox startap iştirak edib. Həmin 100 startap 300-dən çox iştirakçıya təqdim olunub. Bu startaplardan 65-i minimal həyat qabiliyyətli məhsul (MVP) səviyyəsinə çatıb. Bundan əlavə, akselerasiya proqramları çərçivəsində beş akselerasiya tədbiri keçirilib. Bu layihələr çərçivəsində bir milyondan çox avro sərmayə cəlb olunub”, – deyə A,Əhmədov əlavə edib.