Ankarada təhsil alan, Kompüter mühəndisliyi ixtisası üzrə üçüncü kurs tələbəsi Ramin Oruclu yeni platforma yaradıb. Bu platforma kodlaşmanı öyrənmək üçündür. İstəyən şəxs bu platforma vasitəsilə heç bir müəllim olmadan sıfırdan kodlaşdırmanı öyrənə bilər. Ramin Oruclu Valyuta.az-a platforma haqqında danışıb. 

O, deyir ki, hazırda proqramlaşdırma öyrənmək istəyən şəxslər maddi cəhətdən çətinlik yaradan kurs qiymətləri, şəxsə uyğun olmayan tədris cədvəli və kursların ünvanı, tətbiqin ön planda olmadığı tədris kimi problemlərlə qarşılaşırlar. Bu problemlərə həll yolu olaraq Kodbayt (//kodbayt.az/) platformasını ərsəyə gətirib:

“Sıxıcı və ənənəvi tədris metodlarından fərqli olaraq, Kodbayt insanlara interaktiv və əyləncəli şəkildə öyrənməyi təmin edir. Ənənəvi tədrisi aradan qaldıraraq, istənilən zaman, istənilən yerdə və istənilən cihazda öyrənmə imkanı təqdim edir. Kod yazaraq layihələr yaratmaq, yazdığınız kodu digər insanlarla paylaşmaq və şəbəkə vasitəsilə proqramçılarla ünsiyyət qurmaq imkanı kimi üstünlüklər öyrənmə prosesini daha da asanlaşdırır. Artıq platformamızda 450-dən çox qeydiyyatdan keçmiş istifadəçi var”.

R.Oruclu bildirdi ki, yazılan kodları digər şəxslərlə paylaşma, şəbəkə özəlliyi sayəsində digər şəxslərlə sual-cavab və ünsiyyət imkanı, layihələr yaradaraq daha effektiv öyrənmə kimi imkanlar üçün ödəniş tələb olunur. Bu ödənişin məbləği 29.99 manatdır. Amma ödəniş etmədən də müəyyən bir hissəyə qədər platformadan yararlanmaq mümkündür.

“Bu platformadakı tədrisi digərlərindən fərqləndirən əsas xüsusiyyəti nəzəriyyədən daha çox praktikaya üstünlük verilməsidir. Platformada istifadəçi öyrəndiyini tətbiq edə bilməsi üçün müəyyən layihələr də əlavə edilib. Platformadakı tədrisi yerinə yetirən şəxs artıq rahatlıqla proyekt ərsəyə gətirə biləcək” - R.Oruclu bildirdi.

Əvəz Həsənov