"Azərbaycanda pensiya yaşının yüksək olması ilə bağlı iddiaları biz də eşidirik, amma bu iddialın heç bir əsası yoxdur".

Valyuta.Az-ın məlumatına görə, bunu Əmək və Əhalinin Sosial Müdafiəsi Nazirliyinin Pensiya siyasəti və fərdi uçota nəzarət şöbəsinin müdiri Elnur Abbasov deyib.

Onun sözlərinə görə, hazırda Azərbaycanda əhalinin pensiya yaş həddi yüksək deyil:

“Bununla bağlı mütəmadi olaraq, araşdırma aparılır, sosial-iqtisadi inkişaf baxımından Azərbaycana yaxın olan bir necə ölkənin təcrübəsi davamlı olaraq, öyrənilir”.

E.Abbasov qeyd edib ki, elm və texnikanın inkişafı insanların həyat səviyyəsinin uzanmasına səbəb olub:

“Bunu beynəlxalq təşkilatlar da deyir. Həyat səviyyəsinin ömür uzunluğunun artması nəticəsində pensiya yaşı bütün ölkələrdə mərhələli şəkildə artır. Bu gün elə ölkə tapmaq olmaz ki, o, pensiya yaşını mərhələlii şəkildə artırmasın”.

E.Abbasov qeyd edib ki, bu gün ölkədə 1 milyon 232 min pensiyaçı var, onların 54 faizi 12 ildən artıq pensiya alır.

“Bu pensiyaçıların kapitalı artıq bitib, biz onları Dövlət Sosial Müdafiə Fondunun vəsaitləri hesablarına qarşılayırıq. Pensiyalardan biri yaşa görədir. Bundan əlavə, ailə başçısını itirməyə və əlilliyə görə pensiyalar verilir. Yalnış təfəkkürü qırmalıyıq ki, insan yalnız 65 yaşda pensiya alır".

Nazirlik rəsmisi bildirib ki, hazırda vətəndaşların çalışdığı dövr ərzində ödədiyi məcburi sığorta ödənişi (2016-cı ildən əvvəl və ya sonrakı dövr) pensiya kapitalında nəzərə alınır.

Şöbə müdiri bildirib ki, heç kimin staj dövrü və topladığı vəsait itmir: “Bu pensiya məbləğində öz əksini tapır”