Əksər ölkələrdə olduğu kimi, Azərbaycanda da hələlik kişi və qadınların orta aylıq əməkhaqlarında fərqlər qalmaqdadır. Eyni işi görən kişilər hələ ki, qadınlara nisbətən daha yüksək əmək haqqı alırlar. 2021-ci ildə qadınlar üçün ölkədə orta aylıq əmək haqqı 552,2 manat, kişilər üçün isə 851,7 manat olub. 

Görəsən, bu fərqi aradan qaldırmaq üçün hansı addımlar atılmalıdır?

İqtisadçı ekspert Xalid Kərimli Valyuta.az-a açıqlamasında bildirib ki, sözügedən fərqi aradan qaldırmaq üçün əlavə hansısa bir tədbirlərin görülməsinə ehtiyac yoxdur: 

"Bunun üçün hansısa bir addımın atılmasına ehtiyac yoxdur. Azərbaycanda mövcud qanunvericilik qadınla kişilərə bərabər şərait yaradır. Bu fərqlər sadəcə olaraq iş yerləri yaradanlar tərəfindən ortaya atılır. Ölkədə kişi və qadın həkimi aarsında maaş fərqi yoxdur. Eyni zamanda, təhsil ocaqlarında da bu fərq müşahidə edilmir”. 

Həmsöhbətimiz bildirir ki, kişilərin cəmiyyət, dövlət, ailə qarşısında öhdəlikləri, məhsuldarlığı və beyin quruluşu qadınlara nisbətən fərqlidir:

“Güclü cins nümayəndələrinin gördüyü işlər fərqlidir. Daha riskli, daha ağır və gərgindir. Qadınlar isə belə işlərə ümumən maraq göstərmirlər. Kişi ilə qadın arasında əmək haqqı fərqini aradan qaldırmaq üçün ikincilər də gərək birincilərin gördükləri işləri çətinliklərilə görsün, o riskləri yaşasınlar. Bu halda əmək haqlarında da heç bir fərq olmayacaq. Yəni kişilə qadın arasındakı əmək haqqı fərqi cinsə görə deyil. Gördükləri işə və onun nəticələrinə görədir”. 

Həmsöhbətimizə görə, bu fərq bioloji xüsusiyyətlərə görə yaranır:

“Qadın ana olur, uşağa daha çox diqqət yetirir və karyera imkanları zəif olur. Ona görə də əmək haqqı fərqinin olması adi məsələdir”. 

Ramiz