“Azərbaycanın qeyri-neft sektorunda çalışmaq baxımından əhalinin diqqətini cəlb edən əsas sahə taksi fəaliyyəti sahəsidir”.

Bunu Valyuta.az-a açıqlamasında Liberal İqtisadçılar Mərkəzinin rəhbəri Akif Nəsirli deyib.

Ekspert bildirib ki, hazırda əhalinin əsas marağı yalnız asan iş qurmağın mümkün olduğu sahələrə yönəlib. 

"İndi əhali əsasən taksi fəaliyyəti sahəsinə axın edir. İnsanların əksəriyyəti bu sahəyə maraq göstərir. Bu da həmin sahədə müəyyən rəqabət mühitinin, azadlığın olması ilə bağlıdır”. 

Həmsöhbətimizə görə, əhalinin marağını cəlb edən ikinci istehsal sahəsi isə kənd təsərrüfatıdır:

“Son zamanlar bostan, tərəvəz bitkiləri yetişdirmək, heyvandarlıqla məşğul olan insanların sayı da artır. Bunun nəticəsidir ki, qeyri-neft sektoru üzrə istehsal sahələrinə maraq baxımından kənd təsərrüfatı sahəsi ikinci yerdə qərarlaşıb”. 

Nəsirli bildirib ki, intellektual kəsim üçün daha cəlbedici sahə isə startap layihələridir:

“Əhalininin intellektual kəsimini daha çox cəlb edən sahə isə startap layihələridir. Amma bu sahə yüksək intellekt tələb etdiyindən həmin sahə üzrə hər kəs məşğul ola bilmir. Lakin intellektual kəsim məhz bu sahə ilə məşğulluğa daha çox meyl edir”.

Ramiz