"3 il ərzində işğaldan azad edilmiş rayonlarda 623 yeni iş yerinin açılması çox az göstəricidir".

Bunu Valyuta.az-a açıqlamasında iqtisadçı ekspert Vahid Məhərrəmli deyib. Onun sözlərinə görə, indi həmin ərazilərdə iş yerlərinin sayı daha çox olmalı idi:

“Bizdə dəqiq mənzərə yoxdur. Bilmirik ki, minalardan hansı ərazilər təmizlənib, hansı ərazilərdə hansı işlər görülür, hansı ərazilərdə heç işlər görülmür. Müstəqil ekspertlərdən ibarət qrup olmalıdır, həmin qrup bu bölgələrə səfər etməlidir ki, orada hansı imkanların olduğunu gözləri ilə görsünlər. Biri var gözü ilə görmək, biri də var statistikaya fikir bildirmək”.

Ekspert həmin ərazilərdə də iqlim dəyişikliyinin baş verdiyini qeyd edib:

“Artıq hansı sahə ilə məşğul olmaq lazımdır, bu barədə yeni fikirlərə, təkliflərə ehtiyac var. Bir neçə aydan sonra o torpaqların azad olmasının 3 ili tamam olacaq".

Vahid Məhərrəmov bildirib ki, həmin torpaqlar hələ əhali arasında bölünməyib:

“Bununla bağlı hər hansı ciddi sənəd yoxdur. Həmin rayonların hər birinə məsul şəxs var, onlar iş yerləri ilə bağlı açıqlama verməlidirlər”. 

Qeyd edək ki, Dövlət Statistika Komitəsi 2023-cü ilin yanvar-iyun ayları ərzində işğaldan azad edilmiş rayonlarda 623 yeni iş yeri açılması ilə bağlı məlumat açıqlayıb. Cari ilin ilk 6 ayı ərzində Laçında 328, Şuşada isə 177 yeni iş yeri açılıb.

Aylin