Azərbaycanda artıq uzun müddətdir ki, ASAN, DOST və ABAD kimi sosial xidmət agentlikləri fəaliyyət göstərir. Hansı ki, vətəndaşlar məhz bu xidmətlərdən istifadə etməklə özlərinin müxtəlif məsələlərlə bağlı işlərini həll edirlər. Ancaq hələ də yaşayış yeri haqqında arayış mənzil kommunal istismar idarələri tərəfindən verilir. Halbuki, mənzil məcəlləsinə görə, əhali arasında daha çox “JEK” kimi tanınan Mənzil İstismar Sahələrinin fəaliyyəti qadağandır. 

Valyuta.az-a açıqlama verən iqtisadçı ekspert İlqar Hüseynlinin fikrincə, yaşayış yeri haqqında arayışın ASAN, DOST xidmətləri tərəfindən deyil, yerli icra hakimiyyətləri və bələdiyyələr tərəfindən verilməsi daha məqsədəuyğundur: 

“Fikrimcə, həmin sənədin də ASAN, DOST kimi xidmətlər tərəfindən verilməsini təqdir etmək olar. Amma heç də bütün ərazilərimizdə sözügedən sosial xidmətlər fəaliyyət göstərmir. Məsələ ondadır ki, yaşayış yeri üzrə arayışlar lokal ərazi üzrə verilir. Yəni bu arayışı təkcə “JEK”lər deyil, bəzi qəsəbələrdə hətta yerli icra hakimiyyəti orqanları da verir. Vətəndaşlar yerli icra nümayəndələrində bu arayışları qısa zamanda ala bilir. Yəni sözügedən arayışlar sırf icma mənşəli, texniki əhəmiyyətli sənəd olduğundan, həmin sənədlərin ASAN, DOST xidmətlərilə müqayisədə yerli icra hakimiyyətləri və yaxud bələdiyyələr tərəfindən verilməsi daha məqsədəuyğundur”. 

Ramiz